Riha – Hevseroka DBPê Çîgdem Kiliçgun Ûçar a di mîhrîcana bi boneya 76emîn rojbûna Rêberê Gelê Kurd Abdullah Ocalan li Xelfetiyê tê lidarxistin de axivî, wiha got: “Birêz Ocalan dengê aştiyê bilind dike. Bêdengiya dewletê nayê qebûlkirin.”
Li navçeya Xelfetî ya Rihayê bi boneya 76emîn rojbûna Rêberê Gelê Kurd Abdullah Ocalan bi dirûşmeya “Bi Rêbertiya Azad Ber bi Civaka Demokratîk ve” mihrîcana 4ê Nîsanê tê lidarxistin. Mihrîcan bi awayekî bicoş berdewam kir. Gelek welatî ji bajarên Amed, Şirnex, Mêrdîn, Êlih, Sêrt, Çewlig, Dêrsim, Riha, Dîlok, Edene, Mêrsîn, Tarsûs, Îzmîr beşdarî mihrîcanê bûn.
Gelek dayik, jin û ciwan bi cil û bergên xwe yên herêmî, laçik, kitan, kefî û desmalên kesk û sor û zer beşdarî mihrîcanê bûn û li ber stranan govend gerandin. Di dema gerandina govendê de ciwanan dirûşmên “Bijî Serok Apo” , “Rojbûna te pîroz be ey Serok Apo” berz kirin. Dayikên ji Botanê hatibûn bi stranên gotin govend gerandin û dîmenên rengîn derketin holê.
Bernameya mihrîcanê bi rêzgirtina ji bo cangoriyên di têkoşîna azadî û demokrasiyê de jiyana xwe ji dest dane dest pê kir. Di mihrîcanê de her tim dirûşmên “Bijî Serok Apo” , “Rojbûna te pîroz be ey Serok Apo” hatin berzkirin. Di mihrîcanê de ewilî Hozan Dijwar derket ser dike û li gel ribabê stran gotin û girseyê govend gerand.
‘4ê Nîsanê roja heqîqetê ye’
Dû re Hevseroka MED TUHAD-FEDê Pinar Sakik Tekîn axivî û wiha got: “4ê Nîsanê ne tene rojbûneke ji bo me roja heqîqetê ye. Birêz Abdullah Ocalan bangek kir. Ev bang li hemû cîhanê deng veda. Îro tecrîd berdewam dike. Divê mafê hêviyê demildest were bikaranîn û hemû girtiyên siyasî bên berdan.”
Hunermendan gel coşand
Mihrîcanê bi gotina stranên hunermend Aylîn Demîr û Kadîr Çat berdewam kir. Hunermendan girse coşand. Girseyê li ber stranan govend gerand. Pişt re çîrokbêj Ayhan Erkmen çîroka Derwêşê Evdî û Edûleyê vegot. Dengbêj Hediyeyê jî bi stranên xwe tevkariya çîrokê kir.
‘Birêz Ocalan dîrokê dinivîse’
Pişt re Hevseroka Giştî ya DBPê Çîgdem Kiliçgun Ûçar axivî. Çîgdem Kiliçgun Ûçar bertek nîşanî astengkirinên mihrîcanê da û wiha got: “Meşa azadiya gelê kurd nikare were astengkirin. Keda her yekê ji me di vê meşê de heye. Ciwan bi roja ne dimeşin. Me bi ciwanî dest pê kir wê ev têkoşîn ciwan bimîne. Birêz Ocalan 26 sal in di bin tecrîdê de ye lê fikrên wî Rojhilata Navîn diguherîne. Çîroka birêz Ocalan çîroka vê axê ye. Birêz Ocalan dîrokê dinivîse.”
‘Bêdengiya dewletê nayê qebûlkirin’
Çîgdem Kiliçgun Ûçar peyama Rêberê Gelê Kurd Abdullah Ocalan a di 27ê Sibatê de bi bîr xist û wiha domand: “Birêz Ocalan bi îradeya gel dengê aştiyê bilind dike. Bêdengiya dewletê nayê qebûlkirin. Hûn vedixwînin Meclisê lê tecrîd didome. Desthilat tenê tiştên ku pêk nayên diaxive. Pêdiviya vî welatî bi tiştên pêk werin heye vê yekê jî tene birêz Ocalan tîne ziman. Rêya me ya azadiyê vekirî be.”
‘Dem dema aştiyeke birûmet e’
Pişt re parlamenterê DEM Partiyê yê Rihayê Omer Ocalan axivî û wiha got: “Di hevdîtina dawî de me ji Serokatî re got ‘Baweriya vî gelî bi te û tevgera te heye lê bi dewletê nîne’. Birêz Ocalan jî got ‘Gelê me mafdar e lê divê em aştiyekê ava bikin, divê xwîn bisekine.’Kurd evîndarê aştiyê ne, ji bo azadiyê dijîn. Ciwan, jin dimeşin pêşengtiya me dikin. Di rojhilata Navîn de paradîgmaya Rêberê Gelê Kurd Abdullah Ocalan pêş dikeve. Banga min ji gelê Tirk re ye. Ev 40 sal in gelek êş hatin kişandin. Dem dema aştiyeke birûmet e. Divê gelê Tirk jî vê bibêje. Gelê li vir ji bo aştiyê li vir e. Em jî dê her dem ber bi aştiyê ve bimeşin.”
Roja ewil a mihrîcanê bi dirûşma “Bijî Serok Apo” bi dawî bû.
