Endamên Meclisa Ciwanan a DEM Partiyê ku bi boneya rojbûna Rêberê Gelê Kurd Abdullah Ocalan dimeşe, piştî gihişt Xelfetiyê coşa wan derket asta herî jor. Ciwan li qada mihrîcanê bi awayekî bi coş hatin pêşwazîkirin. Bi taypet piştî peyama Rêberê Gelê Kurd xwendin coş zêdetir bû.
Li navçeya Xelfetî ya Rihayê bi boneya 76emîn rojbûna Rêberê Gelê Kurd Abdullah Ocalan bi dirûşmeya “Bi Rêbertiya Azad Ber bi Civaka Demokratîk ve” mihrîcana 4ê Nîsanê tê lidarxistin. Mihrîcan bi awayekî bicoş didome. Meclisa Ciwanan a DEM Partiyê ku bi dirûşma “Bi civaka demokratîk ber bi azadiyê ve dimeşin” ji Amedê ber bi Amarayê ve sê roj in dimeşin, li Parka 4ê Nîsanê ku qada mihrîcanê ye bi girseyî hatin pêşwazîkirin. Ciwanan ku ji ketina Xelfetiyê heta qada mihrîcanê meşiyan dirûşmên “Rojbûna te pîroz be ey Serok Apo” , “Bê Serok jiyan nabe” , “Bijî Serok Apo” , “Ciwan Fedayiyên Rêber Apo ne”, “Jin Jiyan Azadî Azad Bike Rêbertî”, “Bi can bixwîn em bi te re ne ey Serok”, “PKK gel gel li vir e” berz kirin. Ciwanan di meşe de stran gotin û li çepikan dan.
Dema ciwan nêzî qada mihrîcanê bûn dayikan ew bi kulîlkan pêşwazî kirin. Dema ciwan ber bi parkê ve meşiyan wêneyê Mûstafa Dag û Mahsûm Karaoglan en di meşa Amara ya 2009an de bi guleyên polîsan hatin kuştin hatin hilgirtin û girseyê dirûşma “Şehîd Namirin” berz kir. Ciwanan dû re strana Amara ku hunermend Seyda Perînçek ji bo Mûstafa Dag û Mahsûm Karaoglan nivîsiye gotin. Welatiyên li qada mihrîcanê jî bi dirûşman û çepikan ciwan pêşwazî kirin.
Di dema meşê de pasteya ji bo rojbûna Rêberê Gelê Kurd Abdullah Ocalan hatibû amade kirin dan ciwanan. Ciwanan pişt re paste birîn. Ciwanên bi dirûşma “Rojbûna te pîroz be ey Serok Apo” ketin qada mihrîcanê, dirûşmên “Bijî Serok Apo” û “Ciwan fedayiyên Rêber Apo ne” berz kirin. Piştî ciwan gihiştin qadê nameya ku Rêberê Gelê Kurd Abdullah Ocalan ji wan re şandiye xwendin. Dema name hat xwendin coşa ciwanan zêdetir bû. Mihrîcana li Qada Parka 4ê Nîsanê bi şahî û govendê berdewam dike.
