Colemêrg – Pîvokên ku ji bo Geverê qasidê hatina biharê ne, bi hemû renginiyên xwe deşta Geverê xemiland. Dîmenên dikevin ber çavan û bêhna li derdorê belav dibe ruh dide xweza û jiyanê.
Deşta Geverê ku her sal şahidiya zivistaneke sar, dirêj û têr berf dike, bi bihara xwe jî balê dikşîne li ser xwe. Her sal li Geverê ji metroyekê zêdetir berf dibare û sermayeke pir zêde xwe nîşan dide. Tevî vê berf û sermayê jî piştî 21ê Adarê ku weke hatina biharê tê pênasekirin, berf dihele, serma dişkê û pîvokên ku qasidê hatina biharê ne, deşta Geverê dixemilînin. Îsal jî pîvokan bi hemû renginiya xwe Gever xemilandiye û bi bedewiya xwe balê dikşîne ser xwe. Pîvakên ku bi deng û behna xwe ruh didin xwezayê, mirovan bi rengê xwe û bêhna xwe serbest dikin. Mirovên ku diçin deşta geverê û çav li vê dîmenê dikevin naxwazin dest vê xwezayê berdin û vegerin malên xwe.
Sewalkar jî bi heşînbûna pîvokan sewalên xwe anîne deştê û diçerînin. Pîvok û birên pez dîmen û wêneyên pir rengîn derdixîne holê. Dîmenên dikevin ber çavan nîşan didin ku xweza çiqas zindî û ruh û hêzê dide derdora xwe û her tem jiyanê xweş dike.
