Navenda Ragihandin û Çapemeniye ya HPGê bîlançoya Adarê eşkere kir û diyar kir ku Artêşa Tirk di Adarê de ji bejahî û hewayî 11 hezar û 585 caran êrîşî hêzên gerîla yên di rewşa agirbestê de ne kiriye.
Navenda Ragihandin û Çapemeniyê ya HPGê bîlançoya şer a meha Adarê eşkere kir. Navenda Ragihandina HPGê diyar kir ku Partiya wan PKKê li ser bingeha banga dîrokî ya Rêberê Gelê Kurd Abdullah Ocalan di 1ê Adara 2025an de agirbest ragihandiye û ev agahî parve kir: “Fermandariya me ya Biryargeha Navenda Parastina Gel heman rojê ferman da hemû hêzên me yên bingehîn, tîmên fedaî yên bi taybet hatine wezîfedarkirin, yekîneyên xweser û xweparastinê yên li Tirkiye û Bakurê Kurdistanê ku li gorî biryara agirbestê tevbigerin. Hêzên me hemûyan li gorî vê fermana Partiya me û Fermandariya me nêzîkatî nîşan dan û bi vî rengî tevgeriyan.
Tevî agirbesta hêzên me û biryara partiya me jî dewleta Tirk û hikumeta AKPê di nava vê mehê de êrîşên xwe yên li ser Bakurê Kurdistanê û Herêmên Parastinê yên Medyayê dewam kirin. Artêşa Tirk di Adarê de 11 caran bi çekên kîmyewî, 9 caran bi çekên qedexekirî û 9 caran jî bi droneyên bombebarkirî êrîş bir ser tunelên me yên şer ên li Herêmên Parastinê yên Medyayê. Di heman demê de qadên berxwedanê 169 caran bi balafirên şer, 98 caran bi helîkopterên êrîşê û 11289 caran jî bi çekên giran, top û obusan hatin bombekirin.
Hêzên me jî di heman demê de SÎHAyeke bi tîpa Akinci ya dewleta Tirk ku ji bo keşif û êrîşê tevdigeriya, di 16ê Adara 2025an de li ezmanên Qendîlê li bilindahiya bi 9645 metreyî ji aliyê hêzên me yên Parastina Hewayî yên Şehîd Delal ve hate xistin.
Bîlançoya şer a meha Adarê bi berfirehî bi vî rengî ye:
Êrîşên Tirkiyeyê wiha ne:
Êrîşên bi balafirên şer: 169
Êrîşên bi helîkopteran: 98
Êrîşên bi çekên kîmyewî: 11
Êrîşên bi droneyên bombebarkirî: 9
Êrîşên bi teqemeniyên qedexekirî: 9
Êrîşên bi çekên giran, top û obusan: 11289
