Meclîsa Ciwanan a DEM Partî ya Rihayê banga tevlîbûna meşa “Em bi civaka demokratîk ber bi azadiyê ve dimeşin” kir. Meş dê di 1-4ê Nîsanê de ji Amedê ber bi Amarayê ve bê lidarxistin.
Endamên Meclisa Ciwanan a DEM Partiyê li pêşiya mala ku Rêberê Gelê Kurd Abdullah Ocalan lê ji dayik bûye daxuyanî dan çapemeniyê. Ciwanan di daxuyaniyê de pankarta “Bi Rêbertiyê Azad re ber bi Kurdistana Azad” vekirin.
Endamê Meclisa Ciwanan Seyît Ahmet Şahîn daxuyanî xwend. Şahîn diyar kir ku meş xwedî berpirsyartiyekî dîrokî ye.
Seyît Ahmet Şahîn destnîşan kir ku azadiya fîzîkî ya Rêberê Gelê Kurd Abdullah Ocalan girêdayî azadiya gelan e û bang li ciwanan kir ku tevlî meşê bibin.
Ahmet Şahîn di berdewamiya daxuyaniyê de wiha got: “Em ciwan di wê baweriyê de ne ku aşitî û demokrasî tenê bi azadiyê pêkan e û em ê gavên xwe yên di vê rêyê de bidomînin. Em bang li ciwanên Kurd ên welatparêz dikin ku em ji Amedê heta Amarayê bimeşin.”
Daxuyanî bi dirûşmeya “Bijî Serok Apo” bi dawî bû.
