Parlamenterê Zulkuf Ûçar destnîşan kir ku Rojava Wan e, Êlih e, Amed e û wiha got: “Biryara xwe bidin, hûn dê li cem çete û komên teroristan bin, yan li cem gelê ku hûn her roj jê re dibêjin ‘em birayên hev in’ bin.”
Rêxistina Partiya Wekhevî û Demokrasiyê ya Gelan (DEM Partî), li dijî êrişên li ser Rojava û desteserkirina vîna gel li Kent Meydaniyê daxuyanî da. Di daxuyaniya ku bi sedan kes tev li bûn de dirûşmên “Bijî berxwedana Rojava”, “Bijî berxwedana gelê Kurd”, “Kurdistan goristan ji bo faşîstan”, “Bijî Serok Apo” û “Silav silav ji bo Îmraliyê hezar silav” hatin berzkirin. Hevşaredarên Bajarê Mezin ên Wanê Neslîhan Şedal û Abdullah Zeydan, parlamenterêN DEM Partiyê Mahmût Dîndar û Zulkuf Ûçar, rêveber û nûnerên saziyên sivîl û gelek kes tev li daxuyaniyê bûn.
Bang li desthilatdariyê kir: Biryara xwe bidin
Parlamenter Zulkuf Ûçar di daxuyaniyê de ewilî axivî û nirxandina pêvajoya siyasî kir. Zulkuf Ûçar bang li desthilatdariya AKP-MHPê kir û da zanîn ku divê di siyasetê de durûtiyê nekin. Zulkuf Ûçar bal kişand êrişên li ser Rojava û wiha got: “Rojava Wan e, Êlih e, Amed e, sînorên we nikare me û gelê me yê Rojava ji hev qut bike. Hûn dê li cem çete û komên teroristan bin, yan li cem gelê ku hûn her roj dibêjin ’em birayên hev in’ bin. Biryara xwe bidin, em ê heta dawiyê li gel gelê Rojava bin û demokrasiya wir biparêzin. Dixwazin bi Abdullah Ocalanê ku li Îmraliyê berxwedaneke mezin nîşan daye, di şert û mercên ne wekhev de tev li danûstandinan bibe. Hemû gelê Kurd û dostên wan vê yekê baş dizanin. Li Îmraliyê 26 sal e ku berxwedaneke mezin heye, gelê Kurd bi sedsalan e dest ji berxwedana xwe ya li hemberî vî aqilê kolonyalîst berneda û dê îro jî bernede.”
‘Em ê li dijî zilma we têkoşîna xwe mezintir bikin’
Hevşaredara Wanê Neslîhan Şedal jî axivî û da zanîn ku ew weke hevşaredarên Wanê dê li dijî desteserkirina vîna gelê kurd li ber xwe bidin û têbikoşin. Neslîhan Şedal anî ziman ku yên nerewa desthilata AKP-MHP bi xwe ye û wiha got: “Partiyek ku nerewa hebe ew jî hûn in. Em we ji Roboskî, Zîlan, 33 Gule, dema ku bedena me ji erdê kaş dikin, nas dikin û em vê bîranînê zindî dihêlin. We pêşengên me kirine zindanê, bidarve kirin e, we cenazeyên dayikên me hefteyekê di nava kolanan de hiştiye. Em van ji bîr nakin û em ê li dijî zilma we têkoşîna xwe mezintir bikin.”
‘Em li ber we serî natewînin’
Herî dawî hevşaredar Abdullah Zeydan axivî diyar kir ku li dijî desteserkirina vîna gel ew li dû gotina xwe ya ewil in. Abdullah Zeydan bi bîr xist ku gelê Wanê carekê bersiva hewldana desteserkirina vîna xwe daye û got: “Em li ber we serî natewînin û em desteserkirina vînê qebûl nakin. Me roja ewilî çi gotibe, em ê hê jî li dû gotina xwe ne û em ê destûr nedin ku hûn vîna gelê me bin pê bikin. Em ê nehêlin ku hûn çavkaniyên gel pêşkêşî rantê bikin. Dest ji van kiryaran berdin, heke hûn bibêjin mafê Kurdan ê hilbijartinê tune ye, bi awayekî vekirî bibêjin û sindoqan daneynin.”
