Kurd û dostên Kurdan li Toronto ya Kandayê Newroz pîroz kirin û siyasetmedar Feleknaz Uca di pîrozbahiyê de got: “Hûn li ku dera cîhanê bin bibin, li dora Rêbertiyê bibin yek û ber bi serkeftinê ve bimeşin”
Navenda Civaka Demokratîk a Kurd bi dirûşma “Ji bo azadiya Kurdistanê Newroza Civaka Demokratîk” li bajarê Toronto yê Kanadayê Newroz pîroz kir. Salona pîrozbahiyê bi wêneyên Abdullah Ocalan, pêşengên gelê Kurdistanê, tevgera azadiya jinê, alên Kurdistanî hat xemilandin.
Di pîrozbahiyê de axaftina Rêberê Gelê Kurd Abdullah Ocalan ya li ser Newrozê pêşandan û dirûşmên “Bijî Serok Apo”, “Bê Serok jiyan nabe”, “Jin, jiyan, azadî”, “Bijî berxwedana gerîla” li salonê olan dan.
Siyasetmedar Feleknaz Uca, Hişyar Ozsoy, Serokê Tevgera Îslamî ya Hemdem û Nûjen a Kurdistanê Ahmet Hafiz Turhalli û parlementerên Parlamentoya Kanadayê jî beşdarî pîrozbahiya Newrozê bûn û axaftin kirin.
Feleknaz Uca ev tişt anî ziman: “Hûn li ku dera cîhanê di bin bila bibin, li dora Rêbertiyê bibin yek û ber bi serketinê ve bimeşin. Hişyar Ozsoy, têkildarî pêvajoya ku bi pêşengiya Rêber Apo tê meşandin de axivî û got, “Em ji gelê xwe, saziyên xwe û Rêberê xwe bawer dikin. Yên hesabê Kurdan bikin wê bi ser bikevin, yên ku hesabê Kurdan nekin mehkûmê windakirinê ne.”
Parlamenterên Kanadayî Newroz li gelê Kurd pîroz kirin û diyar kirin ku bi hevgirtina gelan wê zilm û zordarî têk biçe û yekîtiya gelan bi ser bikeve.
Hunermend Rûken Newa, Hezîl, Mervan Tan, Hozan Dilovan û Koroya Zarokan bi stranên xwe gel coşandin. Pîrozbahî bi performansa Koma Govendê ya Jinan a DKTM’ê bi coş bi dawî bû.
