Baroya Amedê nerazîbûn nîşanî biryara jidûrxistina wezîfeya rêveberiya Baroya Stenbolê da û destnîşan kir ku biryara hatiye dayîn li dijî parastinê û pîşeya rojnamegeriyê darbeyek sivîl e.
Baroya Amedê nerazîbûn nîşanî biryara jidûrxistina wezîfeya rêveberiya Baroya Stenbolê da. Baroya Amedê li avahiya xwe daxuyanî da. Hevserokê Giştî yê Komeleya Mafên Mirovan (ÎHD) Huseyîn Kuçukbalaban, rêveberên ÎHDê, rêveberên Komeleya Hiqûqnasên ji bo Azadiyê (OHD) û gelek endamên Baroya Amedê beşdarî daxuyanî bûn.
‘Ev biryar darbeyek sivîl e’
Serokê Baroya Amedê Abdulkadîr Guleç daxuyanî da û vekirina doza li Baroya Stenbolê bi bîr xist û got: “Di danişîna dozê ya 21ê Adarê de dadgehê biryar da ku endamên Rêveberiya Baroya Stenbolê wezîfeya wan were bidawîkirin. Ev biryar tenê ne li ser Baroya Stenbolê hatiye danîn, di heman deme de ev biryar darbeyek sivîl e. Ev biryar êrişa li ser parastina serbixwe, pîşeya parêzeriyê û pergala hiqûqê ye. Daraz nikare biryar bide ku baro wê kîjan daxuyanî b idin. Bi vê biryarê pirr eşkere xuya ye ku dixwazin serbixwebûna baroyan ji holê rakin û di bin her cure fişaran de bihêlin. Di dîroka qedûm a 147 salên Baroya Stenbolê de gelek tişt hatine serê wê û bi darbeyan û tacîzên darazî re rû bi rû maye. Di cuntaya leşkerî ya 1980yê de jî deriyê Baroya Stenbolê hatiye mohrkirin û serokê baroyê yê wê deme hatibû girtin. Ev biryar êrişa li dijî parêzeran û azadiya parastinê ye. Em wek Baroya Amedê bi her awayî piştgiriya hiqûqî didin Baroya Stenbolê û em ê li dijî her cure êrişên dijhiqûqî têkoşîna xwe bidomînin.”
