Amed – Di Newroza Amedê ya ku îsal ji ber banga Rêberê Gelê Kurd Abdullah Ocalan bi coş û kelecaneke mezin hat pîrozkirin de, daxwaza azadiya Abdullah Ocalan a fîzîkî mohra xwe li pîrozbahiyê da.
Newroza Amedê, bi pêşengiya Kongreya Civaka Demokratîk KCD), Partiya Herêman a Demokratîk (DBP), Tevgera Jinên Azad (TJA) û Partiya Wekhevî û Demokrasiyê ya Gelan (DEM Partî) bi dirûşmeyên; ‘Rêbertiya Azad Civaka Demokratîk’ û ‘Civaka Demokratîk ji bo azadiyê’ hat lidarxistin. Bi sed hezaran welatiyên Amedî û bajaran derdorê Amedê bi coş û kelecana “Banga Aştî û Civaka Demokratîk” a Rêberê Gelê Kurd Abdullah Ocalan, bi dirûşma “Rêbertiya Azad, Civaka Demokratîk” Newroz pîroz kir. Bi sed hezaran welatiyên herikîn qadê bi dirûşmeya “Bijî Serok Apo” dilsoziya xwe ya ji bo Rêberê Gelê Kurd Abdullah Ocalan anî ziman. Di Newrozê de nirxandinên Rêberê Gelê Kurd Abdullah Ocalan ên di derheqê Newrozê de hatin guhdar kirin.
Çend hurgulî ji Newroza dîrokî ya Amedê
*Bi sed hezaran welatiyên ku herikîn qada Newrozê bi cil û bergên kurdî, bi bandaj û egalên kesk, sor û zer xwe xemilandibûn. Zarok û ciwanan rûyê xwe bi boyaxa kesk, sor û zer xemilandin.
*Dema peyama girtiyên azadiyê hat xwendin bi hezaran bi yek dengî dirûşmeya “Bijî Berxwedana Zindanan” berz kir.
*Dema peyama HevserokêPartiya Yekitiya Niştimaniya Kurdistanê(YNK)ê Bafil Talabanî hat xwendin gel dirûşmeya “Bijî yekitiya gelê Kurd” berz kir.
*Di Newroza Amedê de ji dengê Rêberê Gelê Kurd Abdullah Ocalan nirxandineke li ser Newrozê hat guhdarkirin. Piştî guhdarkirina nirxandina Abdullah Ocalan bi sed hezaran kesî demeke dirêj dirûşmeyên “ Bijî Serok Apo”, “Bê Serok Jiyan Nabe” berz kirin.
*Di peyamên axêveran de girîngiya banga Rêberê gelê kurd derket pêş û hat gotin ku êdî gel dixwaze Serok Apo li Amedê li qada Newrozê bibîne. Gav neavêtina dewletê hat rexnekirin.
*Ciwanan posterên Rêberê Gelê Kurd Abdullah Ocalan ê mezin rakirin û demeke dirêj li qadê gerandin. Dema ciwanan poster li qadê gerandin, welatiyan dirûşma “Bijî Serok Apo” berz kirin.
*Di Newrozê de peyama Serokê Partiya Demokrat a Kurdistanê Mesût Barzanî hat xwendin. Mesût Barzanî di peyamê de piştgî da pêvajoya çareseriya pirsgirêka Kurd. Barzanî xwest Newroza îsal ji bo hemû gelê Kurd bibe wesîleya aştî û azadiyê.
*Yek kesê ku peyam ji Newrozê re şand jî Serokê CHPê Ozgur Ozel bû.
*Akademîsyenên Aştiyê yên ku duh li Enqerê bi trenê hatibûn Amedê jî derketin ser dikê û gel silav kir.
*Serokê Herêma Kurdistanê Nêçîrvan Barzanî jî peyamek şand Newroza Amedê. Neçîrvan Barzanî piştevanî da pêvajoya ku Rêberê Gelê Kurd Abdullah Ocalan daye destpêkirin. Barzanî anî ziman ku tişta bikeve ser milê wan amade ne ku bikin.
*Postereke mezin a Kemal Kurkut ê ku di newroza Amedê ya sala 2017an de ji aliyê polîs ve hatibû kuştin li qada newrozê hate daliqandin.
*Waliyê Bajarê Silêmaniyê Heval Ebûbekir xwest Newroz bibe Newroza serkeftinê, azadiya Abdullah Ocalan.
* Newroza Amedê bi dirûşmên “Bijî Serok Apo” , “Bê Serok jiyan nabe” û “Jin jiyan azadî” bi dawî bû.
