Gelê Sêrtê Cejna Newrozê bi coşeke mezin pîroz kir. Hevserokê Giştî yê DEM Partiyê Tuncer Bakirhan bal kişand ser banga Rêberê Gelê Kurd Abdullah Ocalan û wiha got: “Ew bang rêya aştiyê nişan dide.”
Gelê Sertê bi dirûşma “Rêbertiya Azad Civaka Demokratîk” bi pêşengtiya DEM Partî, DBP û TJAyê Newroz pîroz kir. Di pîrozbahiyê de Hevserokê DEM Partiyê Tuncer Bakirhan, Parlementera Sêrtê Sabahat Erdogan Saritaş, Parlementera HDPê ya berê Caglar Demîrel, endam û rêveberên DEM Partî, DBP, TJAyê û Dayikên Aştiyê û hezaran welatiyên Sêrtê tev li Newrozê bûn. Şahî li Qada Newrozê ya Sêrtê pêk hat. Bi hezaran gelê Sertê di seatên sibehê de cil û bergên xwe yê Kurdî li xwe kirin û herikîn qadê. Qad bi alên DEM Partî, DBPê û alên kesk, sor û zer ku li ser “Newroz Pîroz Be” nivîsî bûn hat xemilandin.
Di pîrozbahiyê de ji bo cangoriyên Kurdistanê rêz hat girtin û bernameyê dest pê kir. Girseyê li qadê bênavber dirûşmeyên “Bijî Serok Apo”, “Newroz pîroz be” berz kir. Komîteya Amadekar a Newrozê û rêveberên DEM Partî, DBPê û Hevşaredarên Sêrtê yên ku li şûna wan qeyûm hatibû tayînkirin, derketin ser dikê û gel silav kir. Piştî silavkirinê hûnermendê NÇMê Metîn Kiliçarslan derket ser dikê stran gotin.
Agir li Botanê pêket û li Kurdistanê belav bû
Ewilî Parlementera Sêrtê Sabahat Erdogan Saritaş axivî. Sabahat Saritaşê diyar kir ku ji bo aştiyê divê girtigêh vala bibin û got: “Newroz berxwedan e. 50 sal berê li Botanê agirê Newrozê bilind bû. Ev agir li tevahiya Kurdistanê belav bû. Em hezar silavan ji yên xwe kirin Newroz re dişînin. Gelek hevalên me girtî ne. Em silavên xwe ji hevalên girtî re dişînin. Em bi taybet silavên xwe ji Rêberê Gelê Kurd Abdullah Ocalan re dişînin. Rêya me vekirî be.”
Tuncer Bakirhan: Newroz emanetê dayika Sakîne ye
Tuncer Bakirhan di serî de bal kişand ser giringiya Newrozê û wiha got: “Ez bi germahiya agirê Newrozê we silav dikim. Dibêjin ku Newroz ji bo Kurdan çiye? Newroz berxwedana gelê Kurd e. Newroz emenatê dayika Sakîne ye. Em soz didin ev agir dê tu carî venamire. Newroza tevahiya Kurdistanê silav dikim. Gelê Sertê ji bo aşitiyeke bi rûmet her dem li berxwe daye. Newroza ve pîroz be.”
Tuncer Bakirhan: Em Newroza Birêz Abdullah Ocalan silav dikin
Hevserokê Giştî yê DEM Partiyê Tuncer Bakirhan jî anî ziman ku Newroza îsal li serdemeke dîrokî hevrast hatiye û got: “Banga ‘Aştî û Civaka Demokratîk’ a birêz Abdullah Ocalan mohra xwe li Newroza 2025an da. Min silava birêz Ocalan ji we re aniye. Em jî Newroza birêz Abdullah Ocalan pîroz dikin û silav û rêzên xwe dişînin.” Di vê navberê de girseyê bi yekdengî dirûşma “Bijî Serok Apo” berz kir.
Bakirhan, wiha domand: “Em tu caran ewqasî nêzî aştî û azadiyê nebibûn. Birêz Ocalan, ji bo polîtîkayên înkar û redkirinê bi dawî bibin û gelê Kurd bi ziman û çanda xwe bijî ev bang kir. Ji bo ku Elewî bibin hemwelatiyên wekhev û hêviya ciwanan geş bibe, ji bo êdî cenazeyên ciwanên Sêrtî, Samsunî, Trabzonî neyên ev bang kir. Got; ‘Bila Kurd û Tirk li ser zemîneke wekhev û bi xwişkûbiratî û demokratîk bijîn.’ Gelo hûn jî li gel vê bangê ne? Birêz Abdullah Ocalan tenê bang li Kurdan nekir. Her wiha bang li kedkar û karkerên Tirkiyeyê kir.
Heke em pêdiviyên vê bangê bicih bînin û berpirsyariyên xwe pêk bînin, em ê bi hev re deriyê Tirkiyeyeke bêşer û bêkedxwarî vekin. Hinek kesên xwenezan dibêjin ‘Kurd têk çûn lewma ev bang hate kirin.’ Berevajî vê, di banga birêz Abdullah Ocalan de têkçûyî yan jî serkeftî tune ne. Birêz Abdullah Ocalan dibêje ‘Serkeftiyên tu şerî tune ne, lê dê aştî bi 85 milyon welatiyan bide qezenckirin û pêşiya kuştina ciwanan bigire.’ Lewma ev banga aştiyeke birûmet û jiyaneke wekhevîparêz e. Pisûleya me birêz Abdullah Ocalan e, rêgeha me ‘Banga Aştî û Civaka Demokratîk’ e. Heta ku rêgeha me diyar be û pisûleya me saxlem be, em ê rojên tarî ronî bikin û bi ser bikevin.
Bang li îktîdarê kir
Banga min ji bo partiya îktîdarê ye; heke hûn ji dil bin, gelo hûn qebûl dikin ku pêşeroja demokratîk a Tirkiyeyê were avakirin û pêdiviyên bangê bicih bînin? Heke hûn jî li gel vê bin, wê demê qeyûmê we tayînî Sêrtê kiriye paş ve bikişînin. Da ku em bawer bikin hûn ji dil in. Rêzê nîşanî îradeya gelê Sêrtê bidin.
Birêz Erdogan digot ‘mekanîka derbeyê.’ Rast dibêje. Birêz Erdogan heke mekanîka derbeyê hebe, jehrkuja vê demokrasî, azadî, bidawîkirina polîtîkaya tayînkirina qeyûman e û avakirina zemîneke demokratîk e ku Kurd, Ereb, Elewî û baweriyên cuda bikarin li ser bijîn. Heta ku hûn qeyûman tayîn bikin, hûn ji vê mekanîkê re xizmetê dikin. Hêvîdarim ku kesên heta niha digotin ‘Kurd tune ne’ û ‘Em îradeya Kurdan nas nakin’ biguherin û veguherin. Em ê jî ji bo ku banga birêz Ocalan jiyanî bibe em ê 24 saetan kolan bi kolan bixebitin.”
Piştî axaftina hevserok Tuncer Bakirhan agirê Newrozê ji aliyê dayikên aştiyê, Tuncer Bakirhan û Parlementera Sêrtê Sabahat Erdogan Saritaş ve hat pêxistin. Paşê Parlementara HDPê ya berê Caglar Demîrel axivî. Caglar Demîrelê diyar kir ku Newroz dê bibe wesîleya aştiyê û wiha got: “Em ji bo aştiyê têdikoşin. Felsefeya me “Jin Jiyan Azadî” ye. Salan e em tên qirkirin lê me dev ji doza xwe berneda. Newroza Rêberê Gelê Kurd pîroz be.”
Pîrozbahî bi Konsera hundermen Nacî Mizgîn bi dawî bû.
