Amed – Li navçeya Qoser a Mêrdînê Newroz bi awayekî bicoş hate pîrozkirin. Welatiyên ku tev li bernameya Newrozê bûn xwestin ku dewlet jî gavek berî gavekê şert û mercên Rêberê Gelê Kurd Abdullah Ocalan sererast bike ku bikaribe di pêvajoyê de bêtir rola xwe bilîze û gotin: “Li aliyekê li me bixin û li aliyê din jî bêjin em li hev werin nabe.”
Pîrozbahiyên Newroza ku îsal bi dirûşma “Rêbertiya Azad, Civaka Demokratîk” tê pîrozkirin didomin. Duh yek ji bajarên ku Newroz lê hate pîrozkirin jî navçeya Qoserê ya Mêrdînê bû. Bernameya Newroza ku bi hezaran kes tev li bûn bi awayekî bi coş derbas bû. Di Newrozê de posterên Rêberê Gelê Kurd hatin hilgirtin û daxwaza azadiya wî hate kirin. Welatiyên ku tev li Newrozê bûn bal kişandin ser peyama Rêberê Gelê Kurd Abdullah Ocalan û diyarkirin ku divê ew demildest azad bibe.
Welatiya bi navê Seyhan Yuksel (37) bal kişand ser banga Rêberê Gelê Kurd Abdullah Ocalan û wiha got: “Em di vê pêvajoyê de bi Rêberê xwe re ne. Em ji banga wî re rêzê digirin. Hêvî dikin ku AKP xayîntiyê neke. Xapandinek hebe ev pêvajo naçe serî. Em ê li dûv Serokê xwe û heval û hogirên xwe bin. Heke dewlet vê xwînê bisekinîne zarokên me dê di nava aştiyê de mezin bibin. Em dixwazin bi xwişk û biratî wiha bicoş û keyf Newrozên xwe pîroz bikin. Îşelah Newroza îsal dê bibe Newroza azadiyê.”
‘Em heta dawiyê bi pêvajoya ku birêz Abdullah Ocalan daye destpêkirin re ne’
Fettah Tekîn (60) ê bi pîrozkirina Newroza Rêberê Gelê Kurd Abdullah Ocalan dest bi axaftina xwe kir, wiha got: “Em weke gelê kurd heta dawiyê bi pêvajoya ku birêz Abdullah Ocalan daye destpêkirin re ne. Ew bêje çi em bi wî re ne. Lê belê tiştê ku divê dewlet bike jî heye. Hêviya me ew e ku dewlet jî gavek berî gavekê şert û mercên birêz Abdullah Ocalan sererast bike ku bikaribe di pêvajoyê de bêtir rola xwe bilîze. Li ser civakê bandora wî heye. Weke hûn dibînin di hemû Newrozan de behsa birêz Ocalan tê kirin. Ev gel ji roja ewil heta îro bi birêz Ocalan re ye. Em tev li biryara wî dibin. Lê divê dewlet jî kare xwe bike. Hêj jî zimanê dewletê zimanekî jehrî ye. Divê vî zimanî terk bike. Divê derhal şert û mercên birêz Abdullah Ocalan xweş û baş bikin ku bikaribe bi rêxistina xwe re bikeve diyalogê û rêxistina xwe jî qaneh bike. Birêz Ocalan banga komkirina kongreyê kir lê hêj operasyon berdewam in. Di van şertan de dê kongre çawa pêk were. Divê derhal ev şer û operasyon bên bidawîkirin.”
‘Em bi Serokê xwe bawer in’
Fettah Tekîn, bal kişand ser êrişa li dijî gundê Berxbotan ê Kobanê ku 9 welatiyan jiyana xwe ji dest dan û wiha domand: “Ji malbatekê dê û bav û zarok 9 kes şehîd kirin. Ev nayê qebûlkirin. Divê dewlet gavê biavêje ku gelê kurd baweriya xwe bi vê pêvajoyê bîne. Hêj hevalên me yên nexweş di zindanan de bi mirinê re rûbirû ne nayên berdan. Em heta dawiyê bi Serokê xwe bawer in.”
‘Divê Serokê me azad bibe’
Dayika bi navê Mestûre Bîlge (60) ku xwest Rêberê Gelê Kurd Abdullah Ocalan azad bibe wiha got: “Di vê pêvajoya nû de em dixwazin ev tecrîda li ser Serokê me bê rakirin. Em dixwazin aştî pêk were, Serokê me azad bibe û ev şer raweste. Em jî dixwazin weke her miletekê bibin xwedî nasname. Em ji bo aştiyê tev li Newrozê bûn.
‘Tiştek ji banga Serok baştir nîne’
Welî Ozdogan (56) diyar kir ku piştgiriyê didin banga Rêberê Gelê Kurd Abdullah Ocalan û wiha axivî: “Aştî ji gelê kurd, tirk û ereb re tiştekî pêwîst û bi qiymet e. Em dixwazin gelê tirk û Rojhilata Navîn jî piştgiriyê bide vê bangê. Tiştek ji şer, nexweşî û mirinê naçe serî. Em dixwazin ev xelas bibin. Tiştek ji banga Serok bi xêrtir û baştir nîne. Ji bo aştî pêk were divê her du alî muzakereyan bikin.”
Em dixwazin Serok Apo were berdan’
Ciwanê bi navê Adar Hesen (18) jî wiha got: “Em dixwazin Serok Apo were berdan. Em dixwazin em û tirk weke xwişk û birayan bin û em gelê kurd bibin yek.”
‘Aştî û şer bi hev re nabin’
Welatiyê bi navê Îsmaîl Bûlût (66) jî bal kişand gavneavêtina dewleta tirk û wiha got: “Li aliyekê li me bixin û li aliyê din jî bêjin em li hev werin nabe. Aştî û şer bi hev re nabin. Divê şer bisekine ku aştî bimeşe. Em dixwazin ev Newroz bibe Newroza aştî, azadî, wekhevî û xwişk û biratiyê.”
