Gelê Mexmûrê bi coşeke mezin agirê Newrozê geş kir û Newroz pîroz kir. Beşdarên pîrozbahiyê peyama “Wê ev Newroz bibe Newroza azadiya fîzîkî ya Rêber Apo” dan.
Şêniyên Wargeha Penaberan a Şehîd Rûstem Cûdî (Mexmûr) bi coşeke mezin Şaniya Newrozê li dar xist û Newroz pîroz kir. Pîrozbahî li Navenda Çand û Huner a Mexmûrê (NÇHM) pêk hat. Şêniyên Mexmûrê tevî xwendevanan re û bi deqeyek rêzgirtinê destpê kir.
Qada şahiyê bi wêneyên Rêber Apo, wêneyên şehîdan û alên PKK, KCK, KJK û PAJK’ê hatibû xemilandin.
Piştî rêzgirtinê li ser wate û girîngiya rojê Hevserokê Meclisa Gel Ehmed Şehbaz axaftina vekirinê kir û got: “Em di wê hêviyê de ne ku ev cejin bibe cejna aştî û azadiyê. Ev roj li dijî dîktatoran ronîkirina gelan e. Bi agirê Newrozê re perdeya reş li ser gelan rabû. Çirûska agirê Newrozê tarîtî ronîkir. Girtiyên azadiyê bi çend şikateyan agirê Newrozê geş kirine. Em minetdarê wanin. Em vê Newrozê li Rêber Apo û tevahî gelan pîroz dikin. Wê ev Newroz bibe roja aştî û aramiya gelan. Wê ev Newroz bibe Newroza azadiya fîzîkî ya Rêber Apo.”
Piştî axaftinê, koma şanoyê derket ser dikê û şanoya xwe pêşkêşkirin. Di pey wê de koma govendê ya bi navê Govenda Azadiyê jî hate ser dikê û govenda xwe kirin. Piştî wê koma muzîkê ya Qereçox û koma muzîkê ya Navenda Çand û Huner a Mexmûrê bi hev re hatin ser dikê û bi muzîkên xwe gel mest kirin. Pîrozbahî bi gerandina govenda azadiyê, bi dawî bû.
