Li Serhedê Newroz bi girseyî hat pîrozkirin. Bi hezaran welatî li Serhedê beşdarî pîrozbahiyên Newrozê bûn û bi dirûşma “Bijî Serok Apo” agirê Newrozê pêxistin. Gel azadiya Rêberê Gelê Kurd Abdullah Ocalan xwest.
Bi deh hezaran welatî bi dirûşma “Rêbertiya Azad Civaka Demokratîk/Ji bo Azadiyê Newroza Civaka Demokratîk” li bajarên Serhedê kom bûn û agirê Newrozê pêxistin. Gel bi coşek mezin li dora agirê Newroza 2025an kom bûn û Newroz pîroz kirin.
Agirî
Li Bazara Saman a Agiriyê bi deh hezaran welatî kom bûn û bi coşeke mezin Newroz pîroz kir. Ji serê sibê ve welatî berê xwe dan qadê. Di qadê de dirûşmên “Bijî Serok Apo” û “Bê Serok jiyan nabe” berzkirin. Piştî rezgirtinê pîrozbahî destpê kir. Endama MYK a Partiya Herêmên Demokratîk (DBP) Muazzez Orhan axivî û bal kişand ser girîngiya Newrozê û banga xwedî li derketina bangewaziya Rêberê Gelê Kurd Abdullah Ocalan kir. Dû re parlamenter Sirri Sakik axivî û diyar kir ku divê her kes piştgiriya pêvajoya muzakereyê bike. Piştî axaftina agirê Newrozê hat pêxistin, dirûşma “Bijî Serok Apo’ hat berzkirin. Jehrmar derket ser dikê û pîrozbahî bi gerandina govendê bi dawî.
Dîgor
Li navçeya Dîgor a Qersê jî Newroz bi coşeke mezin hat pîrozkirin. Pîrozbahî li qada navçeyê pêk hat. Parlamenter û siyasetmedar tevlî pîrozbahiyê bûn. Parlamenter Yilmaz Hûn, axivî û bal kişand ser bedelê ku heta niha hatî dayîn û banga xwedî li derketina peyama Rêberê Gelê Kurd Abdullah Ocalan kir
Parlamenter Sabahat Erdogan Saritaş jî bal kişand ser çareseriya pirs girêkan û got: “Ev banga Birêz Abdullah Ocalan xwedî wateyek pir dîrokî ye. Ji bo hemû gelan bangeke bi rûmet e. Di bingehê hemû pirsgirêkên ku îro li Tirkiyeyê tên jiyîn pirsgirêka Kurd heye. Ger pirsgirêka Kurd çareser bibe dê hemû pirsgirêkên aborî û siyasî çareser bibin.
Piştî axaftinan agirê Newrozê ji hêla Dayikên Aştiyê ve hat pêxistin. Komên herêmî derketin ser dike û stranên xwe gotin. Welatî jî bi gerandina govend û berzkirina dirûşma “Jin jiyan azadî” Newroz pîroz kirin.
