Tê gotin ku Şandeya DEM Partî ya Îmralî dê berî Newroza Amedê biçe Girava Îmralî û bi Rêberê Gelê Kurd Abdullah Ocalan re bicivin.
Şandeya Partiya Wekhevî û Demokrasiyê ya Gelan (DEM Partî) ya ji 7 kesên ku Hevserokên Giştî yên DEM Partiyê Tulay Hatîmogullari û Tuncar Bakirhan jî di nav de bûn, di 27ê Sibatê de çûbûn Girava Îmralî û bi Rêberê Gelê Kurd Abdullah Ocalan re hevdîtinek kiribûn. Şandeyê piştî hevdîtinên banga dîrokî ya Rêberê Gelê Kurd Abdullah Ocalan a bi sernavê ‘Aştî û Civaka Demokratîk’ bi raya giştî re parve kiribûn. Vê bangê li cîhanê deng vedabû û piştî vê jî PKK’ê agirbest îlan kiribû.
Şandeya DEM Partî ya di çarçoveya vê bangê de bi gel û saziyên civakî re dicive, bi rêzê ve bi CHP, Partiya Saadet, Partiya Gelecek, TÎP, Partiya EMEK û Partiya DEVA’yê re û gelek sazî û rêxistinên civaka sivîl re hevdîtin kir.
Di heman demê de tê payîn ku şande di 17ê Adarê de bi MHPê û AKPê re jî bicive. Dîsa li bendê ye ku beriya vê hevdîtinê yan jî piştî wê bi Serokê Giştî yê AKPê Tayîp Erdogan re jî hevdîtinek bike. Hê dîroka vê hevdîtinê nehatiye diyarkirin. Nûnerên DEM Partî ragihand ku wê bi Erdogan re jî bicivin. Li aliyê din tê îdîakirin ku Şandeya Îmralî ya dê biçe Îmraliyê û bi Rêberê Gelê Kurd Abdullah Ocalan re bicive. Nayê zanîn ku dê vê carê kî di nava şandeyê de cih bigirin. Tê îdîakirin ku wê şande beriya Newroza Amedê biçin Îmralî û peyamekê ji Îmralî bigire.
