Hevserokê Rêxistina Mafên Mirovan a Efrînê Îbrahîm Şêxo destnîşan kir ku nezî 300 hezar welatî amadekariyê dikin ku vegerin Efrîn, Serêkaniyê û Girê Spî
Di 10ê Adarê de HSD û HTŞê peymana ji 8 xalan pêk tê îmze kirin. Piştî vê peymatê tê payin ku welatiyên ji cih û warên xwe koç bûne dîsa vegerin warên xwe. Hêzên Sûriya Demokratîk û rêveberiya demî ya Şamê piştî di 10ê Adarê de peyman îmze kirin, rê li pêşiya vegera welatiyan vekir. Xala; “Misogerkirina vegera hemû Sûriyeyiyên koçberbûyî li bajar û gundên xwe û misogerkirina parastina wan ji aliyê dewleta Sûriyê ve” rê vedike ku welatî êdî dîsa li cih û warên xwe vegerin. Pişti vê peymanê gelê Efrîn, Girê Spî û Serêkaniyê dest bi amadekariyan kirin ku li warên xwe vegerin.
Tirkiyeyê di 20ê çileya 2018an de bi balafir, tang û topan li dijî gelê Efrînê şer îlan kir û piştî 18ê Adara 2020an bi temamî Efrîn dagir kir. Ji ber êrîşa li dijî Efrînê zêdeyî 300 hezar welatiyên Efrînê ji cih û warên xwe koç kirin. Dîsa salek şûnde artêşa Tirkiyeyê Girê Spî û Serêkaniyê jî dagir kir û bi sed hezaran welatî ji cih û warên xwe koç bûn. Piştî di 10ê Adarê de di navbera HSD û Rêveberiya Demkî ya Sûriyeyê de peyman hat îmzekirin, rêya ku welatiyên koç kirine vegerin axa xwe vebû. Têkildarî mijarê Hevserokê Rêxistina Mafên Mirovan a Efrînê Îbrahîm Şêxo ji Nûçegihana Ajansa Mezopotamyayê (MA) Ceylan Şahînlî re axivî û diyar kir ku hemû gelên Rêveberiya Xweser bi coşeke mezin lihevhatinê pêşwazî dikin. Îbrahîm Şêxo diyar kir ku gelan ji bo vegera wan li benda pêngava ku ji aliyê rêveberiyê ve hatiye avêtin e.
Îbrahîm Şêxo anî ziman ku ew nizanin rewşa amadekariyan çi ye û wiha got: Em dizanin ku ji bo vê yekê wê komîteyek bê avakirin. Li gorî ku me bihîst, Tirkiye û hêzên wê yên dagirker li Efrînê û komên çekdar ên girêdayî rejîma heyî ya Şamê civînek li dar xistin. Di vê civînê de du mijar hatin zelalkirin. Yek jî ew e ku komên paramîlîter ên Tirk girêdayî Artêşa Sûriyeyê ne. Ya din jî vekişandina komên çekdar ji herêmên sivîl ku gund û navenda bajêr jî di nav de ne. Çalakiyên van koman li herêma Efrînê hê jî dewam dikin. Mijarên ku nehatine zelalkirin hene. Tirkiyeyê gavên pêwîst neavêt, lê belê amadekariyên ji bo vegerê bi hemû leza xwe dewam dikin. Bi peymana nû re berpirsyariyên vê yekê xistin stuyê rejîma nû.”
Îbrahim Şêxo destnîşan kir ku ji Efrîn, Serêkaniyê û Girê Spî 300 hezar mirov li benda vegera axa xwe ne û wiha axivî: “Piştî dagirkirina Til Rifat-Şehba, bi qasî 85-90 hezar gelê Efrînê neçar man ji vir koç bikin. Li gelek cihan bi taybetî li Helebê kesên ji Efrînê hene. Em difikirin ku zêdetirî 300 hezar kes vegerin. Bi mehan e em li benda erêkirina rêziknameya qanûnî ya têkildarî vegerê ne. Ji aliyekî ve em li benda Rêveberiya Xweser man, li aliyê din jî bêguman em li benda pêngavên rêveberiya heyî man. Em niha hem di asta neteweyî hem jî di asta navneteweyî de li benda misogeriyê ne. Di vê wateyê de em dibînin ku gavek hatiye avêtin. Lê belê em ê di demeke nêz de vê pêvajoyê di warê mafên mirovan û hiqûqî de bişopînin. Divê baş were zanîn ku ne tenê gel ji Efrînê koç kir, Efrîn jî hate talankirin. Em dizanin ku yên piştre li wir bi cih bûne jî dema ji wir derketine malên Kurdan talan kirine. Em dikarin bibêjin ku tenê dîwarên di malên Kurdên Efrînê de mane, wê îro li wan vegerin. Mafê her mirovî heye ku li ser axa xwe bijî. Gelê Efrînê mîna kokên darên zeytûnê bi çiyayên Kurdan ve girêdayî ye. Her wiha em hêvî dikin ku Newroza 2025’an bi banga Rêberê Gelê Kurd Abdullah Ocalan bibe Newroza azadiyê. ”
