Li gundê Heciya Kurdan a bi ser navçeya Bismilê ku gundê siyasetmedarê Kurd Vedat Aydin e, agirê Newrozê hat pêxistin.
Rêxistinên Navçeya DEM Partî û DBPê yên Bismila Amedê li gundan pîrozbahiya Newroza bi dirûşma “Rêbertiya Azad, Civaka Demokratîk” didomînin. Her du partiyan bi tevî Şaredariya Bismilê ve li gundê Heciya Kurdan a bi ser navçeya Bismilê ve agirê Newrozê hat pêxistin. Gundê Heciya Kurdan di heman deme de gundê siyasetmedarê Kurd Vedat Aydin e ku di 7ê Tîrmeha sala 1991ê de li Amedê hatibû revandin û kuştin. Rêveberên her du partiyan, Hevşaredara Bismilê Mizgîn Ekîn û bi sedan welatiyên gund tev li şahiya Newrozê bûn.
Li meydana gund agirê Newrozê hat pêxistin û welatiyan li ber def û zirnê li derdora agir govend gerandin. Welatiyan xwe di ser agirê Newrozê re hilavêt û cejna xwe bi coş pîroz kirin.
