Hevseroka Giştî ya DBPê Çîgdem Kiliçgun Ûçar destnîşan kir ku pêdivî bi welatek demokratîk û siyasetekî demokratîk heye û got: “Em amade ne ku welatekî demokratîk ava bikin.”
Di çarçoveya civînên gel ên piştî banga “Aştî û Civaka Demokratîk” a Rêberê Gelê Kurd Abdullah Ocalan de li navçeya Depê ya Xarpêtê civîn hate lidarxistin. Hevseroka Giştî ya DBPê Çîgdem Kiliçgun Ûçar û gelek kes tevlî civînê bû. Hevseroka Giştî ya DBPê Çîgdem Kiliçgun Ûçar bal kişand ser civaka demokratîk û banga Rêberê Gelê Kurd Abdullah Ocalan û got: “Destnîşankirina civaka demokratîk, îradeya jiyana hevpar a civakê ye. Em ê bi hev re siyaseta demokratîk û civaka demokratîk ava bikin. Ev ne mijarê serkeftin an jî têkçûnê ye. Birêz Ocalan bi daxuyaniya xwe meseleyê ji vê yekê derxist. Pêwîstî bi welatek demokratîk û siyasetekî demokratîk heye. Em amade ne ku vê ava bikin û li bende her kesên amade ne. Dema ku ev bang dihate kirin, her kes li benda banga Birêz Ocalan bû. Birêz Ocalan banga xwe kir. Wê ji niha şûnde kijan gav bên avêtin.”
Çîgdem Kiliçgun Ûçar bal kişand ser peymana di navbera Fermandarê Giştî yê HSDê Mazlûm Ebdî û Serokê HTŞê Ehmed El-Şara û anî ziman ku peyman ji bo ewlehiya gelên li Sûriyeyê dijîn û baweriyên cuda ye.
Piştre civîn ji çapemeniyê re girtî dewam kir.
