Dîrektorê Rêxistina Çavdêriya Mafên Mirovan a Ewropa û Asya Navîn Hugh Williamson têkildarî peyama Rêberê PKKê Abdullah Ocalan axivî û got: “Divê darizandinên xerab û binçavkirinên keyfî yên ku siyasetmedarên bijarte yên muxalefetê û muxalefeta giştî dikin armanc bi dawî bibin.”
Rêxistina Çavdêriya Mafên Mirovan (HRW) li ser banga Rêberê PKKê Abdullah Ocalan daxuyaniyek da û ji Tirkiyeyê xwest ku vê rewşê veguhere firsendekê ku dawî li binpêkirinên mafên mirovan bîne. Dîrektorê HRWê yê Ewropa û Asya Navîn Hugh Williamson diyar kir ku divê Banga Dîrokî ji bo hikûmetê bibe derfetek ku dawî li pratîka bikaranîna sûcên terorê yên ji bo bêdengkirin û sûcdarkirina siyasetmedar, rojnamevan, parêzer û çalakvanan, bîne.
Hugh Williamson di dewamê de wiha got: “Divê hukûmeta Erdoğan guh bide vê banga dîrokî û doz û lêpirsînên bêbingeh yên li dijî kesên ku tenê ji ber ku azadiya xwe ya raman û rêxistinbûnê bikaranîne an jî tev li çalakiyên din ên rewa bûne, bi girêdana wan a bi PKK’ê re tên sûcdarkirin, berde. Ev dê bibe gava yekem a di riya rast de. Her wiha divê hikûmet hemû mehkûmên ji bo heman sûcan dayî binirxîne û bi dawî anîna sepandina keyfî ya yasayên sucan û girtina muxalîfan pêvajoyeke reformê bide destpêkirin.”
Dîrektorê HRWê yê Ewropa û Asya Navîn Hugh Williamson her wiha ragihand: “Hikûmeta Erdogan soz da ku di Cotmeha 2024an de bi Rêberê PKKê Abdullah Ocalan re rasterast muzakereyê bike û dawî li nakokiyên bi dehan salan ên bi rêxistinê re bîne. Tevî vê yekê, ji wê demê ve zexta xwe ya li dijî muxalefeta siyasî ya legal û çalakiya siyasî û civakî zêde kiriye. Darizandinên bêbingeh û girtinên keyfî yên ku siyasetmedarên mûxalefetê yên hilbijartî û muxalefeta gel hedef digirin, pêkanînên ku di civakek li ser bingeha hiqûqê de cihê xwe nagirinin û ti carî nikarin bibin parçeyek pêvajoya çareseriya nakokiyan.”
