Amed – MED-DERê bi munasebeta bidawîbûna qursên kurmancî û kirmanckî bernameyek li dar xist. Rêveberê MED-DERê Xelîl Îbrahîm Taş, xwest ku her kes xwedî li ziman û çanda xwe derkeve.
Komeleya Lêkolînên Çand û Zimanên Mezopotamyayê (MED-DER) bi munasebeta bi dawîbûna serdema payîzê ya kargehên Kirmançkî û Kurmancî li Eywana Tahîr Elçî ya Baroya Amedê ya li navçeya Yenîşehîr a Amedê bernameyek li dar xist. Hevserokên DBPê Amedê Sûltan Yaray û Mehmet Şirîn Gurbuz, DEM Parti ya Amedê Gulşen Ozer, Hevşaredara Çinarê Semra Akyuz, endam û rêveber, mamoste û şagirtên MED-DERê, rêveberên saziyên sivîl ên civakî û gelek kes beşdarî şahiyê bûn. Di şahiyê de pankarta bi zaravayên kurdî yên kurmancî û kirmancî pankartên “Statuya kurdî, perwerdehiya bi kurdî” û “21ê Sibatê Roja Zimanê Dayikê ya Cîhanê Pîroz Be” hatin daliqandin.
MED-DERê di şahiyê de ewilî têkildarî 21ê Sibatê Roja Zimanê Dayikê ya Cîhanê û zextên li ser zimanê kurdî sînevîzyonek peşkeş kir. Beşdarvanan bi dawîbûna sînevîsyonê li çepikan dan.
‘Em şagirtên xwe weke têkoşerên çand û zimanê kurdî dibînin’
Piştî sînevîzyonê rêveberê MED-DERê Îbrahîm Xelîl Taş axivî. Îbrahîm Xelîl Taş behsa xebatên MED-DERê kir û got: “Kursên me hene. Kesên dixwazin kurmancî û kirmanckiya xwe bi pêş ve bibin tên tev li qursan dibin. Piştî ku qursan diqedînin em belgeyan didin şagirtên xwe. Em şagirtên xwe weke têkoşerên çand û zimanê kurdî dibinin. Divê em ziman di nava mal, komeleyên çand û ziman de nehêlin. Zimanê sih milyonan mirovan e. Divê her kes bi zimanê xwe biaxive. Li çand û zimanê xwe xwedî derkeve.”
‘Zaravayê kirmanckî di bin xetereyeke pir mezin de ye’
Îbrahîm Xelîl Taş qala girîngiya roja ziman û dîroka wê kir. Îbrahîm Xelîl Taş bal kişand ku zaravayê kirmanckî bi tunebûnê re rûbirû ye û wiha berdewam kir: “Zaravayê kirmanckî di bin xetereyeke pir mezin de ye. Ji bo ku ziman bi pêş ve biçe, bi taybetî malbatên bi kirmanckî diaxivin divê li her dere bi kirmanckî biaxivin.”
Helbest hatin xwendin û belge hatin dayîn
Pişt re mamosteyên MED-DERê Selamî Ustun, Mehmet Asana û Mûsa Şanak helbest xwendin. Dû re mamosteyan belgeyên serkeftinê dan xwendekarên ku qursên kurmancî û kirmanckî qedandin. Mamosteyan diyar kirin ku çiqas têkoşîna ziman bidin kêm e û xwestin ku xwendekarên ku tev li qursan dibin bi xebatên xwe ziman bi pêş ve bibin. Dû re mamosteyan spasiyên xwe pêşkeşî xwendekaran kirin ku qursên xwe bi serkeftî qedandin.
Herî dawî Koma Erbanê ya Komeleya Çand û Ziman a Dîcleyê derket ser dikê. Komê bi stranên xwe beşdarvan coşandin. Beşdarvanan li ber stranan govend gerandin û lîlandin.
