Şêniyên gundê Şaxê û Heblerê li dijî projeya bendavê ku wê gundê wan di bin avê de bihêle daxuyanî dan û gotin: “Dîrokê bin av nekin, jiyanê tune nekin.”
Welatiyên gundê Şaxê û Hebler ên giredayî navçeya Cizîrê ya Şirnexê li dijî çêkirina bendava li gundê xwe daxuyanî dan. Tevgera Ekolojiyê ya Mezopotamyayê, Endamên komîsyona xwezayê ya baroyên Amed û Şirnexê, rêxistinên DBP û DEM Partiye yên Şirnex û navçeyên wê, saziyên sivîl ên Şirnexê û gelek kes tevlî daxuyaniyê bûn. Komê li ber cihe ku bi hinceta “Ewlehiyê” ketina wir qedexeyê, daxuyanî dan. Girseyê, dovîzên li ser, “Dîrokê bin av nekin, jiyanê tune nêkin”, “Şax û Hebler ya me ye sermayedar bicehem e” û “Ne HES e projeya tune kirinê ye” dinivisî hilgirtin. Girsê bê navber dirûşmeyên, “Bê xweza jiyan nabe” berz kirin.
Şeniya gund parêzer Dîlan Elçî daxuyanî da û anî ziman ku bi çêkirina bendavê ve cihên dîrokî, çavkaniyên avê û cihe welatiyên herêmê wê bê tunekirin û wiha got: “Çemê Nêrdûşê, çavkaniyeke avê ya xwezayî ye ku ji qûntara Çiyayê Cûdî derdikeve. Ji bo Şirnexê xwedî girîngiyeke mezin a ekolojîk û çandî ye. Ev çemê ku di xebatên çandinî û sewalkariyê de roleke girîng dilîze, di heman demê de ji bo parastina cihêrengiya biyolojîk a li herêmê jî dibe alîkar. Lê mirina masiyan a bi komî û qirêjiya zêde ya ku bi salan e didome nîşan dide ku hevsengiya kîmyewî û biyolojîk a avê têk çûye. Kanên li herêmê, arava xwe rasterast diherikînin çêm û ev yek xetereyekê li ser kalîteya avê û silametîya ekosîstemê çêdike.”
Xetereyên bendavê
Dîlan Elçî di berdewama axftina xwe de xetereya çêkirina bendavê wiha anî ziman:”
*Ekosîstema herêmê wê bi awayekî bêveger zirarê bibîne.
* Şûnwarên dîrokî yên wekî gundên Şax û Heblerê wê bi temamî wêran bibin.
*Mîrata şaristaniyên Asûrî, Keldanî û Kurd wê di bin avê de bimîne.
* Gelê herêmê dê careke din bi darê zorê koçber bibin û çavkanîyên debara jiyana xwe wenda bikin. Binketina gundên Şax û Heblerê ya bin ava bendavê de, mîna Heskêfê, tê wateya wêrankirina bêveger a mîrateyên dîrokî û dewlemendiya çandî ya hezar salan. Ji ber vê yekê em bang li rayedarên pêwendîdar, zanyar, saziyên sivîl û tevahiya raya giştî dikin ku ji bo rawestandina vê wêraniyê bikevin nava liv û tevgerê. Ji bo dîrok, xweza û jiyanê divê ev proje bê betalkirin.”
‘Em ê li dijî bendavê têbikoşin’
Endamên OHD parêzer Bahar Eryılmaz û Serfiraz Azad jî axivîn û destnîşan kirin ku ew li dijî projeya bendavê li cem şeniyên gund in û ji aliyê huqûqî ve jî piştgiriya gundiyan bikin. Endamê Komîsyona Xwezayê ya Baroya Amedê Sîdar Gumus jî diyar kir ku ew ê pêvajoya çêkirina bendavê bişopînin. Endama komîsyona Ekolojiyê ya DEM Partiyê Melîs Emine Tantan jî anî ziman ku ew ê destûr nedin projeya bendavê û bang li hemû kesan kir ku li dijî projeya bendavê dengê xwe derxînin. Hevserokê DEM Partî yê Şirnexê Abdullah Gungen jî bi lêv kir ku ew ê li dijî bendavê bi şeniyên gund re bin.
‘Em naxwazin bendav bên çêkirin’
Şeniyê gund Mehmed Beg anî ziman ku gundê wan hatiyê xirakirin û got: “Gundê me gundên dîrokî ne. Gundê me xira bûye û niha bendavê çêdikin. Em naxwazin li gund bendavê çêbikin û em dixwazin gunde me ji nû ve bê avakirin.”
Şeniya gund Hanzade Gok jî anî ziman ku ew dixwazin vegerin gundê xwe û li dijî bendavê ne.
