OHD ji ber lêgerîn û derxistina petrolê ya li herêma Gabarê ku bûye sedema qirêjiya av, ax û birîna daran, ji bo demildest lêkolîn û kontrol werin kirin serî li Midûriyeta Jîngeh, Bajarvanî û Guherîna Avhewayê ya Bajarê Şirnexê da.
Komeleya Hiqûqnasên ji bo Azadiyê (OHD) piştî lêkolîna ku di 17ê Cotmeha 2026an de li qadên lêgerîn û hilberîna petrolê yên li herêma Gabarê ya Şirnexê pêk aniye, serlêdaneke fermî kir. OHDê di daxwaznameya xwe de diyar kir ku li qadê kolandinên berfireh hatine kirin, dar hatine birîn, qadên şînkahî yên xwezayî hatiye wêrankirin û bermahiyên kîmyewî yên petrolê tev li nav avên çeman û axê bûne.
‘Mafê jiyana di jîngeheke tendurist de tê binpêkirin’
Di daxwaznameyê de hat bibîrxistin ku li gorî xala 56an a Destûra Bingehîn û Qanûna Jîngehê ya bi hejmara 2872yan, erka parastina xwezayê û astengkirina qirêjiyê berpirsyariya dewletê ye. OHDê xwest ku kontrol tenê bi kişandina wêneyan sînordar nemînin û xwest di hemû bîrên sondajê, xetên boriyan û cihên depokirinê de lêkolîn werin kirin û li van herêman ji avên ser erd, binerd û axê nimûne werin girtin û ev nimûne di laboratuvaran de werin lêkolînkirin.
Di serlêdanê de hat destnîşankirin ku ev xebatên derxistina petrolê û qirêjkirina li herêmê ji bo xwezayê û tenduristiya gel metirsiyeke mezin diafirîne. OHDê xwest ku bi beşdariya saziyên tenduristî, çandinî û avê li tevahiya qadê lêkolînên teknîkî werin kirin, raporên ÇEDê werin kontrolkirin, xebatên ku zirarê didin xwezayê werin rawestandin û derbarê berpirsiyaran de doz were vekirin.













