Çalakvana mafên mirov û girtiya siyasî ya Îranê Nêrgiz Mihemedî got: “Metirsiya darvekirinê li ser Pexşan Ezîzî, Werîşe Muradî û Şerîfe Mihemedî heye, divê ji bo betalkirina cezayê wan helwestek tund bê nîşandan.”
Çalakvana mafên mirovan û girtiya siyasî ya Îranê Nêrgiz Mihemedî têkildarî binpêkirinên mafan li Îranê û metirsiya darvekirina Pexşan Ezîzî, Werîşe Muradî û Şerîfe Mihemedî li ser hesabê xwe yê medya dijîtal peyamek belav kir.
Nêrgiz Mihemedî da zanîn ku divê rêgezperestî û cezayê darvekirinê yê bi komîkî li Îranê wek sûc tê danîn, bê nasandin û bê sekinandin. Nêrgîz Mihemedî got: “Bang li civaka navdewletî dikim ku piştgiriya xelkê Îranê ya di têkoşîna ji bo demokrasî û mafên jinan de bikin.”
Her wiha Nêrgiz Mihemedî destnîşankir ku metirsiya darvekirinê li ser Pexşan Ezîzî, Werîşe Muradî û Şerîfe Mihemedî heye û wiha got: “Daxwazê ji parlementoya Îtalyayê dikim ku helwestek tund li beramberî siyaseta çewisandinê ya rejîma Îranê nîşandin û mijara mafên mirov bixin karê xwe yê sereke.”
Nêrgiz Mihemedî da zanîn ku rejîma Îranê bi hinceta serhildana ‘jin jiyan azadî’zilmê li jinan dike û got: “Jin ji ber zextan bêzar bûne û destdirejî li jinan tê kirin û bi awayek sîstematîk tên çewisandin. Desthilata Îranê astengiya herî mezin a li pêş bidestxistina azadî û dadperweriya xelkê Îranê ye.”
