Şaredariya Peyasê di nav Pirtûkxaneya Berhemên Jinan de bi navê pirtûkxaneya Aştiyê ya Dayika Taybet Înan vekir. Dayika Taybet di sala 2015an de, di dema qedexeya derketina derve de li navçeya Silopiyê ya Şirnexê li ber mala xwe hatibû qetilkirin û cenazeyê wê bi rojan li kolanê hatibû hiştin.
Bi hevkariya Gerînendetiya Polîtîkayên Jinan a Şaredariya Peyasê û Komeleya Xebata Civakî ya ji bo Aştiyê (BATOÇA), di nav Pirtûkxaneya Berhemên Jinan a li Parka 75an de beşek bi navê Pirtûkxaneya Aştiyê ya Dayika Taybet Înan hate damezrandin.
Di merasîma vekirinê de Hevşaredarên Peyasê Bêrîvan Gulşen Sîncar û Cengîz Dûndar, ligel malbata dayika Taybet Înan, Dayikên Aştiyê û endamên komeleya BATOÇA amade bûn.
‘Navê dayika min ket dîroka Kurdistanê’
Di bîranînê de keça dayika Taybet, Şaristan Algan axivî û da zanîn ku dayika wê dayika hemû Kurdan e û wiha got: “Dayika min her tim ji me re digot ‘ez dema mirim min bi kesk, sor û zer bixemlînin û wek şehîdekî oxir bikin.’ Ew bu dîrok ket dîroka Kurdistanê. Dayika Taybet ne tenê dayika me ye dayika hemû Kurdan e. Ew tu car nayê jibîrkirin, ji heft heya heftê salê dayika min di hişê gelê Kurd de cih girtiye.”
‘Ji bo ew êş dîsa neyên serê me divê em mil bidin pêvajoya aştiyê’
Hevşardara Peyasê Berîvan Gulşen Sîncar diyar kir ku ew dayika Taybet tu carî nadin ji bîr kirin û ev tişt anî ziman: “Bi hezaran kesan ji bo rûmeta gelê Kurd jiyana xwe ji dest dan, dayika Taybet jî yek ji wan kesan bû. Gelê Kurd di sedsala komara Tirkiyeyê de herî zêde di deh salên dawî de êş û elem dîtin, ji bo ew êş dîsa neyên jiyandin divê em mil bidin pêvajoya aştiyê.”
Dayika Aştiyê Leyla Aslan jî dest nîşan kir ku ew dê dayika Taybet her tim bi bîr bînin û di bîra xwe de bidin jiyandin.
Bernameya bîranînê bi berzkirina dirûşma “Şehîd Namirin” bi dawî bû.
