Hevseroka Giştî ya DEM Partiyê serdana çalakiya mexdurên erdhejê ku li ber Wezareta Dadê 11 roj in di nobede de ne, kir.
Hevseroka Giştî ya DEM Partiyê Tulay Hatîmogullari, Serokwekîlê Koma DEM Partiyê Sezaî Temellî û Rêxistina DEM Parti ya Enqereyê serdana nobeda mexdurên erdhejê ku bi daxwaza darizandina kesên îxmala wan heye 11 roj in li ber Wezareta Dadê dane destpêkirin, kir. Mexdûrên erdhejê ku 11 roj in di nobede de ne, li her wezaretê wêneyê qurbaniyên erdhejê û dovîzên daxwazên wan li ser nivîsandibûn raxistin. Endam û nûnerên partiyên siyasî û saziyên civakî jî ji bo piştgiriyê tev li çalakiyê bûn.
Tulay Hatîmogullari ku serdana nobedê kir di serî de yek bi yek daxwazên mexdûrên erdhejê guhdar kir û nîşe girt. Piştrê jî Tulay Hatîmogullari li vir daxuyaniyek da.
‘Daxwazên malbatan bibînin’
Tulay Hatîmogullari anî ziman ku di salên dawî de erdheja herî mezin wan jiya ye û wiha axivî: “Lê me her tim got erdhej nakuje lê rant dikuje. Heke avahiyên li gor erdhejê bihata çêkirin û kontrolkirin ew qas kesan jiyan xwe ji dest nedidan. Niha jî malbatan edaletê dixwazin. Yên berpirsin dixwazin bên darizandin. Malbat dibêjin divê doz bê ceza encam nebin ku bûyerên wisa neqewimin. Malbat ji bo vê di nobedê de ne. Bi heman hestê hatine vir. Dayikeke ku zarokên xwe di erdhejê de windakiriye li vir e. Divê wezaret vê yekê bibîne. Ez li vir bang li polîsan jî dikim, êşa malbatan binînin û astengî ji çalakiyê re dernexin.”
‘Em heta dawiyê li kêleka mexdûrên erdhejê ne’
Tulay Hatîmogullari di dewama axaftina xwe de daxwazên malbatên erdhejê jî bi bîr xist û ev tişt anî ziman: “Daxwaza malbatan ew e ku Wezaretê Dadê înisiyatîf bigire daku dosyayên erdhejê bê ceza nemînin. Em hêvî dikin daxwaza malbatan bi Wezîrê Dadê re pêk were û edaletê misoger be. Em vê yekê weke mexdûrên erdhejê dixwazin, weke DEM Partî dixwazin. Em ji darazê re jî dibêjin heta niha axa, beg û mutahît hatin parastin. Mutahîtan neparêzin û edaletê pêk bînin. Em spasiya xwe ji malbatan re jî dikin ku ji bo êdî kes di erdhejê de nemirin di nav çalakiyê de ne. Em heta dawî li cem wê ne. Têkoşîna we têkoşîna me ye.”
Piştre jî malbatên erdhejê axivîn û daxwazên xwe anîn ziman. Mexdûrên erdhejê di nobedê de ne bi berzkirina dirûşmên “Kes dengê me dibihîse yan na” û “Ji bîr kirin tune ye, efûkirin tune ye û helalkirin tune ye” êşa erdhej û daxwazên xwe anîn ziman.
Çalakiya nobedê ya malbatên erdhejê heta pêkanîna hevdîtina bi Wezaretê Dadê re dê bidome.
