Amed – Girtî Ozgur Sevîm ê ku li Girtigeha Kirşehîrê dimîne dîsa bi rêya telefonê li malbata xwe geriya û diyar kir ku pirsgirêkên girtîgehê ku 22ê Çileyê 2025an parve kirîbû nehatine çareserikirin û got: “Ava vexwarinê hê jî zengarî diherike û ji ber ava zengarî em hemû nexwaş dikevin.”
Ozgur Sevîm di dema qedexeya derketina derve ya li navçeya Nisêbîna Mêrdînê de, 31ê Gulana 2016an hat binçavkirin û girtin. Dadgeha Cezayên Giran a 4emîn a Mêrdînê bi îdiayên “xerakirina yekitî û yekpareya dewletê”, “kuştina bi zanebûn”, “zirardayina malê cemaweriyê” û “madeyên talûke bêyî destûrê li cem xwe girtiye” cezayê muebeta girankirî û 15 sal ceza lê birîbû. Ceza di 11ê Cotmeha 2022yan de ji hêla Dadgeha Bilind ve hatiye erêkirin.
Ozgur Sevîm niha li Girtigeha Ewlehiya Bilind a Kirşehîrê girtî ye. Ozgur Sevîm 22ê Çileya 2025an de bi malbata xwe re bi rêya telefonê axivî bû û bal kişand bû binpêkirinen mafên ku Girtîgeha Kirşehîrê tên kirin.
‘Îdare guh xwe girtî ye’
Girtî Ozgur Sevîm îro dîsa bi rêya telefonê ve bi malbata xwe re axivî û bal kişand li ser binpêkirina mafan. Dayika Ozgur Sevim, Behiye Sevîm têkildarî mijarê axivî û diyar kir ku îdareya Girtîgeha Kirşehîrê guhê xwe li hemberî daxwazên girtiyan girtî ye û nêzîkatiya kêfî ya girtîgehê li hemberî girtiyan berdewam dike û got: “Kurê min geriya û dîsa got ku pirsgirêkên 22ê Çileya 2025an me parve kirin, nehatine çareserkirin û îdare dîsa bi kêfî nêzîkî me dibe. Ava vexwarinê hê jî zengarî diherike û ji ber vexwarina avê em hemû nexwaş dikevin.”
‘Îdare tiştên ji derve tên bi kêfî nade girtiyan’
Behiye Sevîm da zanîn ku tiştên ku ji kurê xwe re dişîne rêveberiya girtîgehê nade wan û wiha got: “Ev demeke dirêje kurê min cilan xwestibûn û min jê re cil şandibûn. Lê kurê min telefon kir û ji min re got ‘îdare wan cilan bi awayek kêfî nade me û dibêjin biçin kantîna girtigehê bikirin. Tiştên vir biha ne pênc qatên derve difiroşin me. Îdare nêzîkatiyeke pirr kêfî nîşanî me dide û em vê rewşa kêfî qebûl nakin. Heke pirsgirêkên av ê neyê çareserkirin em ê hemû nexwaş bikevin. Êdî ji niha şûn ve li vir çi bê serê min û hevalên min îdareya Girtîgeha Kirşehîrê perpirsiyar e’.”
Behiye Sevîm diyar kir ku ji bo mafên binpêkirinê dê serî li Komeleya Mafên Mirovan (ÎHD), Komeleya Malbatên Girtiyan bidin û got: “Divê demildest ev pirsgirêk bên çareserkirin. Êdî tu tehamula me nemaye û zarokên me hemû ji ber nêzîkatiya kêfî nexwaş dikevin.”
Dayika Ozgur Sevîm têkildarî binpêkirina mafên girtiyan 22ê Çileya 2025an de Ajansa Welat re axivî bû û wiha gotibû: “Mudiriyeta Girtîgeha Kirşehîrê Muameleya kêfî li zarokên me dike û dema ku zarokê me binpêkirinê mafan protesto dikin jî cezayên disîplînê wan dibirin û mafê hevdîtina malbatê qedexe dikin.”
Ozgur Sevim 22ê Çilya 2025an de bi malbata xwe re ragihandibû ku ava girtigehê nayê vexwarin û gotûbû: “Ava zengarî didin me, em nikarin avê vexwin û yê ku vê avê vexwe jî nikare mehekê li vir bijî. Ava ku em cilên xwe pê dişon jî zengerî ye. Tu paqijî ya girtîgehê nîn e û mirov nikare di nav van şert û mercan de bijî. Dema ku em van pirsgirêkan bi îdareyê re parve dikin, îdare cezayê disiplînê li me dibire”
