Amed – Serokê Odeya Bijîşkan a Amedê Veysî Ulgen têkildarî êrîşên ku li ser bijîşkan zêde dibin diyar kir ku bijîşk di şertê giran de dixebitin û got: “Dê ji bo tenduristiya gel çalakiyên me bidomin.”
Di demên dawî de zextên li ser xizmetkarên tenduristiyê zêde dibin. Her wiha xizmetkarên tenduristiyê nikarin di nava şertên aram û tenduristî de bixebitin. Ev yek bandoreke neyînî hem li ser karê bijîşkan hem jî li ser tenduristiya bijîşkan dike. Serokê Odeya Bijîşkan a Amedê Mehmet Veysî Ulgen têkildarî zextên li ser xizmet û xizmetkarên tenduristiyê ji Ajansa Welat (AW) re axivî. Mehmet Veysî Ulgen, da zanîn ku bijîşk tenê bi pîşeya xwe nikarin debara xwe bikin û ji ber vê yekê jî neçarin li gel karê xwe karên din jî bikin. Mehmet Veysi Ulgen, bal kişand ser şertên bijîşkan û wiha got: “Şert û mercen bijîşkan û xebatkarên tenduristiyê di aliyê aborî de ne baş e. Ji ber vê yekê jî du sê karan dikin. Em dixwazin ku bijîşk û xebatkarên tenduristiyê tenê karekî bikin. Ji ber ku di nexweşxaneyê de ewlehiya xizmetkarên tenduristiyê tune ye gelek xizmetkarên tenduristiyê rastî êrîşan hatin. Hewceye ku xizmeta tenduristiyê civakê di aliyê derûnî û fizîkî de pêş ve bibe. Lê em dibînin ku pêşveçûn tune ye. Îro tenduristî bûye bazirganî. Em li dijî wê ne. Em dibêjin ku bazirganiya tenduristiyê nabe. Tenduristî li tevahiya cîhanê bûye bazirganî. Ji bo vê pandemî û newxeşiyên kronîk zêde dibin. Di tenduristiyê de zayend, netew divê neyên cudakirin. Tenduristî mafê hemû mirovan e.
‘Bijîşk kêm in’
Mehmet Veysî Ulgen bal kişand ser kêmasiyên teknîkî yên li nexweşxaneyan û wiha axivî: “Nexweşxaneyên dewletê qels in, kemasiyên amûran zêde ne, bijîşk kêm in. Odeyên nexweşxaneyên dewletê kêm in. Ji bo randêvuyan bi telefonê piştî mehan wext didin. Li Amedê 7 nexweşxaneyên taybet hene ew jî bi pere ne, gelên xizan nikarin herin nexweşxaneyên taybet. Li Amedê nexweşxane pir kêm in. Ji ber ku cîh tine gel nikarê here nexweşxaneyê. Nexweşxane li dijî erdhejê qels in. Klîma û kalorîferên wan baş naxebitin. Pêwist e nexweşxaneyên li nava bajêr zêde bibin. Bijîşkên ji derveyî bajêr tên ji ber ku bajêr nasnakin, zimanê gel nizanin pir nasekinin û diçin.”
Divê dest ji politîkayên bazirganiyê berdin
Veysî Ulgen da zanîn ku di cîhanê û Tirkiyeyê de tendûrûstî bûye taybet û dewlêt qîmetê nadin tenduristiya gel û wiha bi dawî kir: “Divê dawî li politîkayên bazirganî bînin. Wezareta tendûrûstiyê hewceye ku guh bide saziyên tendurîstiyê û mafên xebatkarên tendûrûstiyê bidê. Ji ber vê yekê bijîşk di 14ê sibatê de ketin grevê. Dê di 14ê Adarê de jî tevahî bijîşk bikkevin grevê, dest ji karên xwe berdin. Ji bo maf, ewlehiya me û tendûrûstiya gel xebatên me dê bidomin.
