Hevseroka Giştî DBPê Çîgdem Kiliçgun Ûçar, di çalakiya li Wanê de diyar kir ku tayînkirina her qeyûm, nîşandana sabotekirina pêvajoya ku Abdullah Ocalan daye destpêkirin e û got: “Çav û dilê me li daxuyaniya dîrokî ya Abdullah Ocalan e.”
Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Hevseroka Giştî ya Partiya Herêmên Demokratîk (DBP) Çîgdem Kiliçgun Ûçar li Wanê li ber Van Mall AVMê daxyanî dan. Girseyê di daxuyaniyê de dirûşmên “Bijî Serok Apo”, “Zeydan û Şedal vîna me ne” û “gelê Wanê li vir e, li ba vîna xwe ye” berz kirin. Serokê Giştî yê Partiya Kedê (EMEP) Seyit Aslan, Berdevka Partiya Azadiyê ya Civakî (TOP) Juliana Gozen, Endamê Rêveberiya Navendî (MYK) ya Partiya Çep a Kesk Naci Sonmez, Alîkara Serokê Giştî yê Partiya Tevgera Karkeran (EHP) Senem Deniz Kûral, Endamê Rêveberiya Platforma Tifaqa Sosyalîst (SODAP) Orhan Kok, Serokê Giştî yê Partiya Avakirina Sosyalîst (SYKP) Feray Mertoglu, rêxistinên DBP û DEM Partiyê yên herêmê, parlementerên DEM Partiyê û gelek welatî tev li daxuyaniyê bûn.
‘Birêz Ocalan 26 sal in ji bo aştiyê dixebite’
Hevserokê Giştî yê DEM Partiyê Tûncer Bakirhan ewil axivî û bal kişand ser zêdehiya polîsan. Tûcer Bakirhan, anî ziman ku ev yek dagirkeriye û wiha got: “Gelê wan bi hilgirtina her 14 şaredariyan jî bersiva herî xurt da we. Hûnê biçin û wê gelê Wanê ser bikeve. Dê bêjî qey welateke biyanî dagirdikin wisa êrîşî şaredariyê kirin. Birêz Ocalan ji bo aştiyê ev 26 sal in dixebite û dê demeke nêz de jî nexşerêyekê aşkere bike. Lê hûn çidikin? Ez vekirî dibêjim, ev dest aştiyê dixwaze, hûn çi dixwazin, dijminatiya Kurdan? Xelasbûna Tirkiyeyê di qeyûm, xesp, diziya vînê de nîne. Xelasbûn Tirkiyeyê di biratiya bi Kurdan re, biratiya bi gelên din re ye.”
‘Em dest ji gotina aştiyê bernadin’
Hevseroka Giştî ya DEM Partiyê Tulah Hatîmogûllari jî anî ziman ku gelê Wanê di 31ê adarê de dîrok nivîsand û got: “Îsraîl çawa nêzîkî Filistînê dibe, serdegirtina şaredariyê jî wisa bû. Ji bo tayînkirina qeyûm bi zanebûn 15ê Sibatê hatiye hilbijartin û em vê yekê şermezar dikin. Hûn çi bikin jî em ê dest ji gotina aştiyê bernadin. Em ê dest ji tekoşîna xwe bernedin.”
‘Çav û dilê me li daxuyaniya dîroka ya Abdullah Ocalan e’
Hevseroka Giştî ya DBPê Çîgdem Kiliçgun Ûçar jî di daxuyaniyê de axivî û diyar kir ku qeyûmê tayînî Şaredariya Wanê hatiye kirin 2024an de ji Komeleya Pirtûkxanevanên Tirkiyeyê xelat hilgirtiye. Çîgdem Kiliçgun Ûçar, bi lêv kir ku xwezî vî waliyî ew pirtûk xwendiban ku hinekî demokrasî, hiqûq, edalet zanîba û ev tişt anî ziman: “Em bang li walî dikin ku wê qoltixê careke din bide hevşaredarên hatine hilbijartin. Gelê Wanê ti car dîl nehatiye girtin û ji niha pê ve jî nayê girtin. Tayînkirina her qeyûm, nîşandana her tundiyê sabote kirina pêvajoya ku Abdullah Ocalan daye destpêkirin e. Heke aqleke we yê çareseriyê hebe, hûn jî daxuyaniyeke dîrokî bikin. Çavên me û dilên me hemûyan li daxuyaniya Birêz Ocalan e. Ev berxwedan wê bi daxuyaniya dîrokî ya Abdullah Ocalan bigihije hev.”
Partî û saziyên çepgir jî piştgirî dan Gelê Wanê
Piştî daxuyaniyê girse heta avahiya DEM Partiyê meşiyan. Di meşê de dirûşmên “bijî serok apo”, “Neslîhan Şedal û Abdullah Zeydan rûmeta me ne” û “bê serok jiyan nabe” hatin berzkirin. Meş di demeke nêz de gihişt bi hezaran kesan û gelek kesên ku dixwestin tev li meşê bibe ji aliyê polîsan ve hatin astengkirin. Gel bertek nîşanî vê yekê da û polîsan jî êrîşî gel kir û gelek kes binçav kirin.
Piştî meşê çalakî bi dawî bû.
