PYDê têkildarî pêşketinên li Sûriyeyê daxuyaniyek weşand û diyar kir ku entegrekirina QSD û YPJê ya di saziyên dewletê de û gavên li ser zimanê Kurdî girîng in û got: “Mafên gelê Kurd divê bibin beşek yekgirtî ya avahiya destûrî û siyasî ya Sûriyeya nû.”
PYDê têkildarî pêşketinên dawî yên li Sûriyeyê daxuyaniyek nivîskî weşand. PYDê gavên di vê qonaxê de hatine avêtin, bi taybetî nîqaş û gavên têkildarî entegrekirina HSDê di nav saziyên dewletê de û naskirina zimanê Kurdî wekî geşedanên erênî pênase kir, lê bal kişand ku ev gav ji bo çareseriyek domdar netêrker in.
Di daxuyaniya PYDê de hat destnîşankirin ku pirsgirêka Kurd li Sûriyeyê pirsgirêkek bingehîn e û ev tişt got: “Em pêşketinên erênî yên ku di vê qonaxê de li Sûriyeyê diqewimin pêşwazî dikin û wekî gavên girîng di pêvajoya avakirina Sûriyeyeke nû de dibînin. Lê ev gav têrê nakin. Mafên gelê Kurd divê beşek yekgirtî ya avahiya destûrî û siyasî ya Sûriyeya nû be.”
‘Beşdariya Kurdan yekitî û aramiya Sûriyeyê xurt dike’
PYDê beşdariya Kurdan a di avakirina saziyên dewletê, jiyana siyasî, leşkerî, îdarî û çandî de wekî hêzeke bingehîn ji bo Sûriyeyê pênase kir û diyar kir ku ev beşdarî dê yekitî û aramiya welat xurt bike, cihêrengiya civakî jî çavkaniya rastîn a hêzê ye.
‘Divê YPJ di saziyên fermî de rol û statuya jinê nîşan bide’
Di berdewamiya daxuyaniyê de bal hat kişandin ser rola jinan û hat gotin: “Pêwîst e entegrekirina Yekîneyên Parastina Jinan (YPJ) di nav saziyên fermî yên dewletê de bi awayekî ku rol û statuya jinan di avakirina Sûriyeya nû de nîşan bide, temam bibe.”
‘Divê destûra nû gelê Kurd wekî neteweyek yekgirtî nas bike’
PYDê ji bo pêşeroja Sûriyeyê bang li aliyan kir ku garantiyên destûrî werin avakirin û daxuyaniya xwe bi van tiştan bi dawî kir: “Divê destûra nû ya Sûriyeyê bi zelalî gelê Kurd wekî neteweyek yekgirtî û hevkar nas bike; zimanê Kurdî û mafên siyasî, çandî û neteweyî yên gelê Kurd biparêze. Bi vî awayî prensîba hevkariya rastîn di navbera hemû pêkhateyan de ava dibe. Em gavên hatine avêtin erênî dibînin, lê teqez dikin ku temamkirina wan bi destûra nû rêya ber bi hevkariyek rastîn û Sûriyeyek bihêz ve ye.”
