Girtiyê siyasî Seyda Şimşek ê ku 30 sal 9 meha di zindanê de ma û îro li girtîgeha Amedê tahliye bû. Seyda Şîmşek diyar kir ku kêyfxweşiya herî mezin ew e ku rojekî Rêberê Gelê Kurd Abdullah Ocalan li derve pêşwazî û hembêz bikin.
Seyda Şîmşek di sala 1995an de li Mêrsîne hat binçavkirin. Piştî binçavkirinê li DGMya hejmara 1e mîn ya Edeneyê hate darizandin û cezaye mûebetê lê hate birîn. Cezayê girtiyê siyasî Seyda Şimşek di 30yê Mijdara 2025an diqediya. Ji ber hincetên ku tevlî faaliyetên girtîgehê nebûye ji aliyê Lîjneya Îdarê û Çavdêriyê ve tahliyebûna wî 9 mehan hate taloqkirin. Piştî 30 sal 9 mehan girtiyê siyasî Seyda Şîmşek hate berdan û bi girseyî li ber girtîgeha Amedê hate pêşwazîkirin. Endamên TUAY-DERa Amedê, malbata Seyda Şimşek û gelek kes bi dirûşmeya “Bijî berxwedana zindanan” û bi tilîliyan pêşwazî kirin. Malbata Seyda Şîmşek di saet 09.00 sibê heya 22.30an li ber derê girtîgehê benda tehliyekirina wî man.
‘Ew roj dê bê em ê Rêberê xwe li derve hembêz bikin’
Seyda Şîmşek di axaftina xwe de bal kişand ser azadiya fizîkî ya Rêberê Gelê Kurd Abdullah Ocalan û got: “Tişta herî girîng ew e ku hemû hevalên me bên berdan. Bi vê re gelê me di nava jiyaneke azad û jiyaneke demokratîk de bijî. Kêyfxweşiya me ya herî mezin ew e ku em ê rojekî Rêberê xwe li derve hembêz bikin.”
