Civîna di navbera Fermandariya YPJê û Wezîrê Karên Navxwe ê Hikûmeta Demkî ya Sûriyeyê de bi dawî bû. Li gorî çavkaniyên taybet, YPJê dê weke yekîneyek taybet di nav wezaretê de cih bigire û xweseriya wê were parastin.
Fermandariya Yekîneyên Parastina Jin (YPJ) û Wezareta Karên Navxwe ya Hikûmeta Demkî ya Sûriyeyê duh civînek girîng pêk anîn.
Li gorî agahiyên ku çavkaniyên taybet dan; civîn duh (26ê Tebaxê) saet di 23:00an de dest pê kir û saet di 00:15an de bi dawî bû.
Di civînê de ji Fermandariya YPJê Newroz Ehmed, Sozdar Hacî, Xalsa Ayêd û Berdevka Nivîsgeha Ragihandinê ya YPJê Rûken Cemal û Wezîrê Karên Navxwe yê Sûriyeyê Enes Hesen Xetab amade bûn.
Xweseriya YPJê dê bibe îstîsna
Çavkaniyan derbarê naverok û encamên civînê de diyar kirin ku dê rewşa YPJê li gorî xweseriya herêmên Kurdan weke “îstîsna” bê destgirtin. Li gorî vê yekê, tê plankirin ku YPJ weke yekîneyeke taybet a Dijberî Terorê (HAT/Antîteror) di bin banê Wezareta Karên Navxwe de cihê xwe bigire.
Heman çavkaniyan destnîşan kir ku derbarê mijarê de biryara dawî nehatiye dayîn û nîqaşên aliyan ên li ser vê mijarê berdewam dikin.
