Li Menemenê derbarê êrişên nîjadperest ên li Zongûldak û Duzceyê daxuyaniyek hate dayîn. Hevserokê DEM Partiyê yê Menemenê Yoldaş Çîftçî diyar kir ku mirov ji ber nasnameya xwe, îradeya jiyana hevpar hedef tên digirin û xwest ku lêpirsîneke bi bandor bê meşandin.
Li ber avahiya DEM Partiyê ya Menemenê derbarê êrîşên nîjadperest ên li Zonguldak û Duzceyê yên li dijî karkerên demsalî yên Kurd daxuyaniyek hat dayîn. Nûnerên Partiya Wekhevî û Demokrasiyê ya Gelan (DEM Partî), Partiya Karkerên Tirkiyeyê (TÎP) û Partiya Azadiya Civakî (TOP) tevlî daxuyaniyê bûn. Metna daxuyaniyê ji aliyê Hevserokê DEM Partiyê yê Menemenê Yoldaş Çîftçî ve hate xwendin.
Yoldaş Çîftçî destnîşan kir ku karkerên Kurd ên demsalî diçin bajarên cûda û ji ber şert û mercên xebata bêewle bi kedxwariyê re rû bi rû dimînin û her wiha ji ber nasnameya xwe rastî cudakarî û nîjadperestiyê tên. Yoldaş Çîftçî bal kişand ser êrîşên li Zongûldak Alapli û Duzceyê û got: “Êrîşên nîjadperest ên li ser karkerên çandiniyê yên Kurd ên li Zongûldak Alapli û Duzceyê nayên qebûlkirin. Hedefgirtina mirovan ji ber nasnameya wan a etnîkî an jî bajarên wan, îradeya me ya jiyana hevpar û pêşeroja me ya demokratîk hedef digire.”
‘Bila lêpirsînek bi bandor bê meşandin’
Çîftçî diyar kir ku ev êrîş divê wekî bûyerên ferdî neyên dîtin û nayê qebûlkirin ku bi vî rengî bên piştguh kirin û anî ziman ku ji bo rêgirtina li ber van êrîşên nîjadperest ên ku dikarin gelan bînin beramberî hev, divê lêpirsîneke bi bandor bê meşandin û kesên tevlî êrîşê bûne û organîzekirine divê li ber qanûnê hesab bidin û got: “Divê şert û mercên xebatê yên bêewle yên karkerên çandiniyê yên demsalî bi dawî bibin. Şert û mercên cîwarbûnê yên van kesan ên li bajarên ku diçinê divê bên başkirin. Pêwîst e ku jiyana perwerdehiyê ya zarokên ku ji ber mecbûriyetê bi malbatên xwe re dixebitin neyê qutkirin.”
Di dawiyê de Çîftçî banga “berpirsiyariyê” li wezaretên têkildar kir û got ku ew ê li hemberî êrîşên nîjadperest û şert û mercên xebatê yên xirap bêdeng nemînin û ew ê her dem li kêleka ked, piştvanî û welatîbûna wekhev bin.
Daxuyanî bi çepikan bi dawî bû.
