Malpera Dengê Girtiyên Kurd û Îranî ragiahand ku aqûbeta 47 welatiyên Kurd ên li Rojhilatê Kurdistanê hatine binçavkirin nediyare
Hêzên rejîma Îranê di nava mehekê de 47 welatî û çalakvanên Kurd binçav kirin û derbarê rewşa wan de tu agahî nayê zanîn. Malpera Dengê Girtiyên Kurd û Îranî raporek li ser binçavkirina welatî û çalakvanan li Rojhilatê Kurdistanê weşand.
Li gorî raporê, di vê mehê de herî kêm 47 welatî û çalakvanên Kurd bêyî fermana dadwer û bi karanîna tundiyê ji aliyê hêzên îstîxbarata Artêşa Pasdaran ya Îranê ve li bajarên cuda yên Rojhilatê Kurdistanê hatine binçavkirin.
Her wisa hate eşkerekirin ku ev 47 welatiye li bajarên Mihabad, Kirmaşan, Kamyaran, Merîwan, Şino, Bokan, Miyandaw, Ûrmiye, Serdeşt, Nexede û Sineyê hatine binçavkirin. Du zarokên di bin 18 salî de, ku yek ji wan keçe, jî di nav binçavkiriyan de ne.
Her wisa hate gotin ku heta niha di derbarê aqûbeta van 47 welatiyan de tu agahî tune ne.
