Piştî pêvajoya entegrasyona li Rojava dest pê kir, xelkê Efrînê 8 sal şûnve vegeriya warê xwe. Hate zanîn ku li Efrînê jî bo parastina gel dê lîwayek leşkerî ji şervanên Efrînî were avakirin.
Li Rojavayê Kurdistanê û Sûriyeyê ji duh pê ve, nîqaşan bi temamî cihê xwe ji entegrasyona leşkerî û siyasî re hişt. Piştî hevdîtina heyeta Rojava û Şamê, Fermandarê Giştî yê Hêzên Sûriya Demokratîk (HSD) Mezlûm Ebdî li Şamê ragihand ku HSD erka xwe temam kiriye û xwe fesix kiriye.
Heta niha di navbera heyeta Rojava û Şamê de li ser 4 lîwayan lihevkirin pêk hatiye. Lîwayên Dêrik, Qamişlo, Hesekê û Kobanê ji aliyê Wezaretê ve hatiye pejirandin. Lîwaya Dêrik, Qamişlo û Hesekê girêdayî bajarê Hesekê ne û lîwaya Kobanê jî girêdayî bajarê Helebê ye.
Ev demek bû ku avakirina lîwayek li Efrînê jî di rojevê de ye. Xelkê Efrînê piştî pêvajoya peymana 29ê Çile dest pê kir, 8 sal şûnve vegeriyan warê xwe Efrînê. Xelkê Efrînê ku vegeriya dixwest ku di warê parastinê de hêzek wan were sazkirin.
Li gorî çavkaniyên ku me agahî ji wan wergirtiye; hate zanîn ku li Efrînê jî dê lîwayek ku ji şervanên Kurd ên Efrînî pêk tê, were avakirin û girêdayî îdareya Helebê be.
