Fermandarê Giştî yê HSDê Mazlûm Ebdî ragihand ku mîsyona HSDê bi dawî bû û xwe wekî hêzeke leşkerî ya xweser fesix dike. Ebdî got: “Em dixwazin îro bibe destpêka guhertineke rasteqîn ji qada şer ber bi qada avakirinê ve, ji dema çekê veguhere dema aştiyê û ji qonaxa parastina Sûriyeyê veguhere qonaxa avakirina Sûriyeyê.”
Piştî hevdîtinên ku ji duh ve li Şamê di çarçoveya temamkirina bendên peymana 29‘ê Çileyê ya di navbera HSD û hikûmeta demkî ya Sûriyeyê de têne kirin, îro Fermandarê Giştî yê HSDê Mazlûm Ebdî daxuyaniyek li koşka gel a li Şamê da.
Mazlûm Ebdî got: “Birêz serok, malbatên şehîdên me yên leheng, hevalên çekê; keç û xortên welatê me, gelê Sûriyeyê:
Em îro di kêliyeke dîrokî de li pêşberî we sekinîne û rûpeleke girîng di dîroka Sûriyeyê de ditewînin û dîrokeke nû ku sernavê wê aştî, istiqrar û avakirina welat vedikin. Ji destpêka avakirina Hêzên Sûriyeya Demokratîk ve, şervanên wê di qonaxên herî zehmet de ku Sûriyeyê tê re derbas bû berpirsyareke mezin higirtin. Şervanan ji dema hikûmetê Baasê ve piştre dema terora DAIŞê gelek bajar û bajarokên Sûriyeyê rizgar kirin.
Di van şeran de şervanên me berdêlên mezin dan û jiyana xwe feda kirin. Bi hezaran şehîd ji bo mîsogeriya siberojeke ewle ji bo zarokên Sûriyeyê şehîd bûn.
Îro merc hatin guhertin û welat derbasî qonaxeke nû bû ku sernavê wê aştî, hevpariya di avakirina Sûriyeya nû de ye. Piştî lihevkirina bi serok El Şera û temambûna pêvajoya entegrekirina hêzên me di nava tûgayên artêşa Sûriyeyê em îro bidawîbûna mîsyona QSD‘ê radighînin. Em bi berpirsyarî fesixkirina wê wekî hêzeke leşkerî ya serbixwe radighînin.
Em ê bi hev re bîranînên şehîdên xwe hilgirin û fedakariyên wan di wijdanên xwe biparêzin; ji ber ku ne ji ber şer, lê ji ber roja were ku pêdiviya Sûriyeyan bi şer çênebe, şer kirin. Em dixwazin ev roj bibe destpêka guhertineke rasteqîn a ji qadên şer ber bi qadên avakirin ve, ji zemanê çekê ber bi zemanê aştiyê ve, ji qonaxa parastina Sûriyeyê ji qonaxa avakirina Sûriyeyê ve.”
Derheqê mafên çandî û perwerdeya bi zimanê Kurdî de jî Ebdî wiha got: “Mafê fêrbûna bi zimanê Kurdî yek jî mafên girîng e ku gelê me yê Kurd bi dehên salan e ji bo wê tê dikoşe. Birêz serok di gelek boneyan de parastina vî mafê ragihand. Me helwesteke vekirî der barê mafê hînbûna bi zimanê dayikê û pêşxistina birayra heyî di siberojê jê hîs kir. Em ê îsal vê biryarê pêk bînin da ku karibin di siberojeke nêzîk de li serê wê ava bikin.”
