Çalakiyên parastina Şaredariya Wanê ku di roja 4an de ye, bi bernameyeke têr û tije berdewam kir. Meclîsa Dayikên Aştiyê, Platforma Şaxan a KESKê ya Wanê û EMEPê serdana nobetê kirin.
Nobeta gelê Wanê ku li dijî hewldana qeyûm hatiye destpêkirin, di roja 4an de di bin barîna berfê de berdewam kir. Di çarçoveya çalakiyên îro de li oteleke Wanê Konseya Bajêr kom bû û li vir polîtîkayên qeyûm hatin nîqaşkirin. Li ber Şaredariya Wanê jî gelek hunermendên herêmê derketin ser dikê û bi stranên xwe hewşa şaredariyê geş kirin. Çalakvanan jî bi govendê biryardariya xwe nîşan dan. Her wiha Meclîsa Dayikên Aştiyê jî ji bo piştgiriyê serdana nobeta li pêş şaredariyê kirin. Dayik ji hêla çalakvanan ve bi dirûşma “bijî berxwedana dayikan” hatin pêşwazîkirin. Îro li pêşiya şaredariyê portreyeke ku wêneyên Şêx Seîd, Seyîd Riza û Qazî Mihemed li ser bûn, hat hilgirtin û pankarta “berxwedan jiyan e” hat vekirin.
Dayikên Aştiyê li qadê ji bo çalakvanan axaftinek kurt kirin û berxwedana wan pîroz kirin. Her wiha Partiya Kedê (EMEP) û Konfederasyona Sendîqayên Karkerên Cemaweriyê (KESK) ya Platforma Şaxan a Wanê jî serdana nobetê kirin û piştgiriyên xwe anîn ziman.
Nobeta li pêş şaredariyê didome.
