Li bajarokê Saydnaya ku dikeve bakurê Şamê, komîteyên dêrên Rûm Ortodoks, Suryanî-Ortodoks û Melkîtî bi daxuyaniyeke hevpar ragihandin ku ji ber li dijî girtinên kêfî yên ciwanên xiristiyan û xerabûna rewşa ewlehiyê hemû şahiyên xwe yên cejnên olî yên vê salê betal kirine.
Li bajarokê dîrokî yê Saydnaya ku dikeve bakurê Şamê, komîteyên dêrên Rûm Ortodoks, Suryanî-Ortodoks û Melkîtî bi daxuyaniyeke hevpar ragihandin ku wan hemû şahiyên cejnên olî yên vê salê betal kirine. Ev biryar wekî bertekekê li dijî girtinên kêfî yên ciwanên xiristiyan, xerabûna rewşa ewlehiyê û muameleya nebaş a li ser sînoran hatiye stendin.
Di daxuyaniya hevpar de hat gotin ku heta ciwanên wan neyên berdan tu şahiyeke cejnê li dar nexin.
Li gorî daxuyaniyê, cejnên navdar ên wek Cejna Veguhertina Mesîh, Cejna Rakirina Meryemê, Cejna Xaçê û Cejna Hagia Sophia îsal nayên pîrozkirin. Dêran diyar kirin ku ev helwest protestoyeke civakî û mafxwaz e.
Dêrên herêmê her wiha bal kişandin ser girtinên bêbingeh, rawestandina saetan li derbasgeha Cdeyde Yabûs û zêdebûna gef û kampanyayên nefretê li ser medyaya dijîtal.
Gelek ciwanên Saydnaya bêyî tu bingeheke qanûnî û bêyî parastina mafên dadwerî hatine girtin û hêj di zindanan de ne.
Di dawiya daxuyaniyê de dêrên Saydnaya daxwaza Sûriyeyeke bi edalet û mafparêz kirin û wiha gotin: “Saydnaya dixwaze nasnameya xwe ya pîroz û aştîxwaz biparêze û her wiha mafên xwe yên destûrî bi rêyên aştiyane dê bidomîne.”
