58emîn Festîvala Çand û Hunerê ya Tetwanê di roja xwe ya 7an de piştî panela “Wêje û ziman”, bi konserên hunermend Ayfer Düzdaş, Servet Kocakaya û koma Bajar bi dawî bû. Festîval dê sibê bi geşta Kraterên Nemrûdê û konserên nû berdewam bike.
58emîn Festîvala Çand û Hunerê ku li navçeya Tetwanê ya Bedlîsê bi dirûşma “Li Tetwanê çand heye, huner heye, em hene” tê lidarxistin, di roja xwe ya 7an de jî bi çalakiyên dewlemend berdewam kir.
Roja 7emîn a festîvalê ku bi panela bi sernavê “Wêje û ziman” dest pê kiribû, di saetên êvarê de cihê xwe da muzîk û stranan. Di bernameya konserê de hunermend Ayfer Duzdaş, Servet Kocakaya û Koma Bajar derketin ser dikê. Stran û berhemên ku ji aliyê hunermendan ve hatin pêşkêşkirin rastî eleqeyeke mezin a welatiyan hatin û bi hezaran kesî bi coşeke mezin tevlî stranan bûn.
Bernameya sibê
Di çarçoveya festîvalê de amadekariyên bernameya sibê jî hatin temamkirin:
Geşta Nemrûdê sibê di navbera saet 10:00 û 13:00an de serdana Golên Kraterê yên Nemrûdê tê kirin.
Performans û Konser: Di bernameya hunerî de Koma Erbaneyê ya KASEDê, Tîma Govendê ya Jinan a Arjînê, Mizgîn Tûran û Tara Mamedova dê performans û konserên xwe pêşkêşî hunerhezan bikin.
