Di êrişa bi balafira bêmirov a li ser herêma Moskowê ya Rûsyayê de, 5 kes mirin û 6 kes jî birîndar bûn. Piştî êrişê li herêma pîşesaziyê şewat derket. Rûsya û Ûkraynayê êrişên hewayî yên beramber domandin.
Li gorî nûçeya ANFê; di êrişa bi balafira bêmirov a li ser Moskowa paytexta Rûsyayê de 5 kesan jiyana xwe ji dest da û 6 kes jî birîndar bûn.
Waliyê Moskowê Andrey Vorobyov li ser hesabê xwe yê Telegramê daxuyanî da û ragihand ku sîstema wan a parastina hewayî êrişa balafira bêmirov a li ser herêmê asteng kiriye, lê li herêma pîşesaziyê Novoselki ji ber li hin noqteyan hate xistin, şewat derket.
Vorobyov diyar kir ku di êrişa li ser qada pîşesaziyê de 5 kesan jiyana xwe ji dest da û 6 kes jî birîndar bûn.
Rayedarên Rûs ragihandin ku li herêma Leningrad 17 balafirên bêmirov hatine xistin, ji ber êrişê li tesîseke lojîstîkê ya aîdî şîrketa e-ticaret Wildberries şewat derket.
Li aliyê Ûkraynayê jî Waliyê Herêma Sumi Oleg Grygorov diyar kir ku ji ber êrişên hewayî yên artêşa Rûs ên di saetên şevê de, du zarok û kalekî jiyana xwe ji dest dan. Grygorov destnîşan kir ku cenazeyên 2 zarokên keç, ji bin kavilên xaniyên hilweşayî hatin derxistin.
Hat ragihandin ku bajarê Herson jî tevahiya şevê ji aliyê hêzên Rûs ve bû armanca êrişan, di êrişê de sivîlekî 52 salî birîndar bû. Êrişên hewayî yên di navbera Rûsya û Ûkraynayê de di hefteyên dawî de zêde bûne.
