Amed – Platforma Ked û Demokrasiyê ya Amedê têkildarî cezayê ku dadgehê li Hevşaredarê Bajarê Mezin ê Wanê Abdullah Zeydan birî, daxuyanî da û got: “Desthilatdar ji bo berjewendiyê xwe hiqûqê bikar tîne û dixwaze şaredariyan desteser bike. Berxwedana wanê dê bi ser bikeve.
Platforma Ked û Demokrasiyê ya Amedê têkildarî cezayê ku 5emîn Dadgeha Cezayên Giran a Amedê li Hevşaredarê Bajarê Mezin ê Wanê Abdullah Zeydan birî, li pêş AZC Plazaya ya Ofîsa Amedê daxuyanî da. Rexistinên Partiya Wekhevî û Demokrasiyê(DEM Partî), Partiya Heremên Demokratîk(DBP), aktivîstên Tevgera Jinên Azad(TJA) ên Amedê û nûnerin saziyên sivîl tevlî daxuyaniyê bûn. Komê di çalakiyê de dûrişmên “Bijî berxwedana Wanê” “Abdullah Zeydan rûmeta me ye” berz kir.
Hevserokê DEM Partiyê yê Amedê Abbas Şahîn anî ziman ku ev polîtîka sed sal in didome û wiha got: “Hûn çiqasî wan polîtîkayên xwe bidomînin jî lê ev gel aştî, azadiyê û jiyanek hevpar dixwaze. Rêberê PKKê Abdullah Ocalan ji bo aştiyê hewl dide lê desthilatdar ji bo berjewendiyê xwe hiqûqê bikar tîne û dixwaze şaredariyan desteser bike. Hûn çi bikin jî ev gel devji aştiyê bernade”
Hevseroka DBPê ya Amedê Sultan Yaray jî anî ziman ku pêwiste dewlet êdî devji vê serdestiya xwe berde û got: Heke hûn dibêjin bila aştî bê vî welatî divê hûn devji wan pratîkên xwe berdin. Hûn hilbijartina 31ê Adarê li Kurdistanê bûn partiya tabelayê.”
Sultan Yaray xwest hikumet dijminatiya Kurdan neke û ji bo çareseriyê gav bavêje û wiha got: “Ev sed salin hûn gelê kurd qir dikin lê gelê kurd dîsa jî destê aştiyê dirêj dike. Lê desthilatdarî li ser gelan tenê xîzanî û tunekirinê ferz dike. Divê dewlet wateya aştiyê bizanibe û gor vê gav bavêje.”
Sekreterê Odeyan Bijîşkan a Amedê (TBO) Ahmet Baran daxuyanî xwend û destnîşan kir ku ev polîtakayên tundiyê dê encamê negirin.
