Hevserokê Giştî yê berê yê HDPê Selahattîn Demîrtaş bi bav û birayê Narîn Guranê re hevdîtin kir û bang li sazî û dezgehên hiqûqê kir ku ji bo edalet pêk were di nava hewldanan de bin.
Hevserokê Giştî yê berê yê HDPê Selahattîn Demîrtaş ku li Girtîgeha Tîpa Fyê ya Edîrneyê bi bavê Narîn Guranê, Arîf Guran û kekê wê Baran Guran re hevdîtin kir û derbarê hevdîtinê li ser hesabê xwe yê Xê daxuyaniyek belav kir.
Selahattîn Demîrtaş di daxuyaniya xwe de diyar kir ku wî dosyaya Narîn Guranê weke hiqûqnasekî lêkolîn kiriye û wiha got: “Di dosyayê de yê ku sûcê wî bi delîlan hatiye ispatkirin tenê Nevzat Bahtiyar e. Di dosyayê de dayika Narîn Guran Yuksel Guran, apê wê Selîm Guran û birayê wê Enes Guran jî hatine girtin. Ev yek karesata hiqûqî ye. Diyar e ku dadgeh ji agahiyên li ser çapemeniyê bandor bûye lê li gor hiqûqê ji bo cezakirinê divê delîl û ispat hebin. Ji bo wê jî divê di kontrolên Îstînaf û Dadgeha Bilind de ev ceza bên xirakirin. Di serî de ez bang li Baroya Amedê û li hemû sazî û dezgehên hiqûqê dikim ku ji bo edalet pêk were di nava hewldanê de bin. Ez ji Wezaretê Dadê jî rica dikim ku vê dosyeyê bi awayekî birêkûpêk lêkolîn bike û bi daxwaza xirakirinê serî li Dadgeha Bilind bide.”
