Şaxa ÎHDê ya Semsûrê rapora xwe ya derbarê şewata li gundên Fahrîkan û Male Bawa amade kiriye, eşkere kir. Di raporê de hat diyarkirin ku 50 hektar qad şewitiye û hat xwestin ku ji bo gumana kana kevirê û xemsariya mudaxaleya agir, lêpirsîneke lezgîn û bi bandor were destpêkirin.
ÎHDa Semsûrê rapora xwe ya lêkolîn û lêpirsînê ya derbarê şewata 28ê Tîrmehê li gundên Fahrikan û Male Bawa yên li ser navenda Semsûrê amade kiriye, parve kir.
50 hektar qad şewitî
ÎHDê da zanîn ku şewat di navbera saet 12:00-13:00an de derketiye û heta roja din domiyaye û got: “Di encama şewatê de nêzî 50 hektar qada ku ji darên fistiq, xurme, zeytûn û darên berûyê pêk dihat şewitî û ziyaneke mezin gihîşt tora avdanê û hawîrdora herêmê. Çavdêriyên heyetê nîşan didin ku mudaxileya şewatê dereng hatiye kirin û agir bi hewldana gundiyan hatiye vemirandin.”
Gumana kana kevir û mudaxaleya bi derengî
ÎHDê bal kişand ser sedema derketina şewatê û wiha got: “Şêniyên li herêmê diyar kirin ku li kana kevir yê nêzî gund teqîn çêbûne û gumana wan heye ku teqîn bûye sedema şewatê. Her wiha hat destnîşankirin ku tevî agahdarkirina zû jî, tîmên vemirandinê bi derengî gihiştine li herêmê. Ev ev rewş “îhmala peywirê” ye.” ÎHDê di raporê de bîr xist ku di salên berê de jî bi heman herêmê şewat derketine, lêpirsînên hatine meşandin jî bêencam mane û got: “Divê neyê jibîrkirin ku zirara li xwezayê tê kirin, rasterast bandorê li jiyana mirovan dike.”
Banga lêpirsîna bi bandor û bersivandina zirarê
Di dawiya rapora xwe de ÎHDê derbarê daxwazên xwe yên hiqûqî û îdarî wiha anî ziman: “Divê Dozgeriya Komarê ya Semsûrê derbarê sedema şewatê, rola kana kevir û xemsariya rayedaran de lêpirsîneke berfireh û kûr bide destpêkirin. Zirara aborî ya gundiyên ku dar û baxçeyên wan şewitîne, divê ji aliyê Walîtiya Semsûrê ve tavilê bê diyarkirin û bersivandin. Em ê wek rêxistineke mafên mirovan vê dosyayê heta dawiyê bişopînin da ku berpirsiyar ji aliyê hiqûqê ve hesab bidin.”
