Şaredariya Bajarê Mezin a Amedê bi projeya “Atolyeya Mûzîkê ya Gerok” ku ji aliyê Konservatuvara Bajar a Aram Tigran ve tê amadekirin, zarokên li gundan bi mûzîk û hunerê re tîne cem hev. Zarokên ku li gundên Arzoxlî û Zorava yên Surê 3 hefte ne perwerdeyê dibînin, amadekariya konsera hefteya çaran dikin.
Serokatiya Daîreya Çand û Karên Civakî ya Şaredariya Bajarê Mezin a Amedê, ji bo piştgirîkirina beşdarbûna zarokan a hilberîna hunerî xebatên xwe yên “Atolyeya Mûzîkê ya Gerok” li gundan didomîne. Di çarçoveya bernameyê de ku berê li gundên Farqîn, Sûr, Rezan û Hênê hatibû meşandin, zarok bi alîkariya rahênerên pispor xebatên mûzîk û ritmê dikin, enstrumanan nas dikin û bi boyaxkirina kaxezên mezin tecrûbeya hilberîna kolektîf hîn dibin.
Amadekariya konserê didome
Kêfxweşiya herî mezin a zarokan niha li gundên Arzoxlî û Zorava yên navçeya Surê xwe dide nîşandan. Şaredariya Bajarê Mezin bi perwerdeya naskirina enstrumanan, ezberkirina stranan û performansa ser dikê hefteya 3yemîn li paş xwe hişt. Zarokên ku li malên xwe stranan jiber dikin û bi kelecan tev li dersan dibin, amadekariyên xwe yên ji bo konsera mezin a ku wê di dawiya hefteya 4an de li taxa wan bê lidarxistin temam dikin. Ji zarokên ku tev li perwerdeyê bûn Mina Guger, Semanur Karakaş û Fatma Eren kêfxweşiya xwe anîn ziman û diyar kirin ku ew yekem car e stranên wiha fêr dibin, li malê dubare dikin û bi heyecaneke mezin li bendê ne ku derkevin ser dikê.
‘Heke em îro xwedî li hev dernekevin kes xwedî li me dernakeve’
Ji welatiyên gund Xanê Toprak jî bal kişand ser giringiya vê xizmetê û got: “Em dixwazin zarokên me tiştên wiha fêr bibin û em girîngiyê didinê. Zarok ji mamosteyên xwe hez dikin û di nav xwe de hevaltiya mûzîkê dikin. Heke em îro xwedî li hev dernekevin kes xwedî li me dernakeve.”
Li gorî bernameya Şaredariya Bajarê Mezin, xebatên atolyeyê yên ji bo zarokan dê di 28ê Tîrmehê de li gundê Tilê, di 29ê Tîrmehê de li Tûtê a Lîcê û di 4-5ê Tebaxê de jî li gundên Qozan û Qerebaşê yên Sûrê berdewam bikin.
