Li Rihayê di çarçoveya “Pêvajoya Aştî û Civaka Demokratîk” de xebateke berfireh hate destpêkirin. Ji gundan heta navenda bajêr gel bi tevlêbûneke xurt tê ba hev, pirsgirêkên xwe nîqaş dike û pêngavên avakirina civaka demokratîk diavêje.
Li Rihayê di çarçoveya pêvajoya Aştî û Civaka Demokratîk de bi şiyara “Em xwe bi rêxistin dikin û civaka demokratîk ava dikin” xebateke berfireh hate destpêkirin. Di çarçoveya xebatan de ku ji aliyê DEM Partî, DBP, TJA û Meclisa Ciwanan a DEM Partiyê ve tê meşandin, li gelek gund, navçe û navenda Rihayê hevdîtinên girseyî têne çêkirin. Gel di van hevdîtinan de rasterast pirsgirêkên xwe nîqaş dike û nêrînên xwe yên derbarê pêvajoyê de tîne ziman.
Di hevdîtinên ku bi tevlêbûneke gelekî xurt û coş û kecaneke mezin birêve diçin de, girîngiya xwe birêxistinkirinê û riyên avakirina civaka demokratîk tên nirxandin.
Tevlêbûna xurt û coşa gel
Ji gundan heta taxên navendê, di her civîn û hevdîtinê de eleqeyeke mezin a welatiyan balê dikişîne. Bi taybetî jin û ciwan bi awayekî çalak beşdarî van nîqaşan dibin. Welatî di van platforman de ne tenê wekî guhdar, di heman demê de wekî aktorên bingehîn ên pêvajoyê derdikevin pêş. Di civînan de pirsgirêkên rojane yên aborî, civakî û siyasî bi berfirehî têne destgirtin û xebatên çareseriyê yên li ser bingeha rêxistina civakî tên nîqaşkirin.
Rêxistinkirina civaka demokratîk
Di hevdîtinan de hat destnîşankirin ku rêya tekane ya parastina aştî û demokratîkbûnê, rêxistinkirina civakê bixwe ye û welatiyên ku di hevdîtinan de diaxivîn jî tînin ziman ku ev civînan ji bo wan bûye qadek ku dengê xwe bi awayekî azad bînin ziman û piştgiriyeke mezin bide hevgirtina civakî.
Hevdîtinên gel ên li gund, navçe û taxên Rihayê tên kirin bi awayekî çoş û xurt berdewam dikin.
