Platforma Yekîtiya Jinên Kurd li ser sînorê Rojhilatê Kurdistanê êrişên rejîma Îranê yên li dijî Başûr û Rojhilat şermezar kir û wiha got: “Neyarên gelê Kurd hêza xwe ya herî mezin ji bêtifaqî û parçebûna gelê Kurd digire. Em bawer dikin ku tekane çareseriya li dijî polîtîkayên serdestan; yekîtî û piştevaniya gelê Kurd e.”
Platforma Yekîtiya Jinên Kurd ji bo protestokirina êrişên rejîma Îranê yên li ser deverên Herêma Kurdistanê li ser sînorê Rojhilat ya bi ser navçeya Seravê ya Wanê ve çalakî li dar xist. Jin li nêzî Deriyê Sînor ê Kapikoyê peya bûn û bi dirûşman heta ber derî meşiyan û li vir daxuyanî dan.
Rêvebera Înîsiyatîfa Yekîtiya Kurd û endama platformê Diba Keskin a ku beriya daxuyaniyê axivî, êrişên Îranê şermezar kir û diyar kir ku jin wê têkoşîna xwe ya li dijî vê yekê mezin bikin.
‘Tevî şerê li gel Amerîka-Îsraîlê jî dev ji kuştina Kurdan bernade’
Piştre Berdevka Platforma Yekîtiya Jinên Kurd Laleş Bîçîmlî metna daxuyaniyê xwend û diyar kir ku rejîma faşîst a Îranê bi salan e bi awayekî hovane Kurdên li Rojhilatê Kurdistanê bi dar ve dike û qetil dike. Laleş Bîçîmlî anî ziman ku polîtîkayên vê rejîmê yên qirker ne tenê aîdî vê serdemê ne û got: “Ji roja ku Kurdistan di nav çar dewletan de hatiye dabeşkirin û heta îro, bi hovitiyeke mezin zext, tundî û qirkirin li ser gelê Kurd dimeşîne. Tevî ku îro Îran ji aliyê DYA û Îsraîlê ve tê bombeberankirin û di bin êrîşan de ye jî, dev ji dijminahî û kuştina Kurdan bernade.”
‘Bi dehan mirov qetil kirin’
Laleş Bîçîmlî da zanîn ku Îranê berê xwe daye Başûrê Kurdistanê û êrîşên hovane li ser pêk tîne û wiha pê de çû: “Di van çend mehên dawîn de bi dehan caran êrîş pêk anîn û bi dehan mirov qetil kirin. Di van rojên dawîn de li Silêmanî û Hewlêrê kampên partiyên Kurd ên Rojhilatê Kurdistanê kirine hedef û bi dron û fuzeyên balîstîk êrîşan pêk tînin Herî dawî êrîş li Komeleya Şoreşgerî ya Zehmetkêşên rojhilatê Kurdistanê hat kirin. Di encama vê êrîşê de neh pêşmergeyên Komeleyê şehîd ketin.”
Bang li cîhanê hate kirin ku bêdeng nemîne
Bi domdarî Laleş Bîçîmlî diyar kir ku li dijî rejîma faşîst, yekîtiya şeş partiyên Rojhilatê Kurdistanê di nav gelê Kurdên Rojhilat de hêvî û baweriyeke bihêz çêkiriye û ev yek li axaftina xwe zêde kir: “Em jî wekî jinên Bakurê Kurdistanê, ji vir bang li hemû cîhan û gelan dikin ku li dijî van polîtîkayên Îranê yên qirêj û hovane bêdeng nemînin û gelê Kurd bi tenê nehêlin. Di heman demê de em bang li jinên Kurd û li hemû gelê Kurd jî dikin ku li dijî van êrîş û darvekirinên rejîma Îranê ya faşîst, yekitî û tifaqa xwe xurt bikin.
‘Çareserî tifaq û yekîtî ye’
Laleş Bîçîmlî bal kişand ser bêtifaqiya gelê Kurd û axaftina xwe wiha bi dawî kir: “Diyar e ku neyarên gelê Kurd hêza xwe ya herî mezin ji bêtifaqî û parçebûna gelê Kurd digire. Her wiha em dibînin ku li dijî hemû polîtîkayên serdestên Kurdan, çareserî tifaq û yekîtiya gelê Kurd e. Em careke din hemû êrîş, qirkirin, û tunehesibandina serdestan a li ser gelê Kurd bi tûndî şermezar dikin û em dibêjin, demildest dev ji van polîtîkayên xwe yên qirêj û qirker berdin.”
Daxuyanî bi berzkirina dirûşma “Yek e yek e yek e gelê Kurd yek e” bi dawî bû.
