Edene – Yek ji kujerên Kadrî Bagdû di 13ê Tîrmehê de ji hêla Sûriyeyê ve radestî Tirkiyeyê hate kirin. Hevjîna Kadrî Bagdû, Şemsê Bagdû diyar kir ku ew dixwazin doz weke ku faîl nediyar e nemîne û wiha got: “Yek ji kujeran anîn Tirkiyeyê lê tu tişt ji me re nehatiye gotin. Em dixwazin doz bi pêş ve biçe. Em ê serlêdanek nû bikin. Doz wê berdewam bike, em dev ji dozê bernadin.”
Kadrî Bagdû bi salan di nava Çapemeniya Azad de cih girt. Li her kolanek bajarê Edeneyê rojnameya Azadiya Welat û Ozgur Gundemê belav dikir. Di 14ê Cotmeha 2014an de dema ku rojname belav dikir li naverasta kolanê wek rêbaza salên 1990î hate qetilkirin. Dosyeya qetilkirina Kadrî Bagdû di sala 2015an de radestî buroya “faîlên meçhûl” hate kirin. Endamê DAIŞê û yek ji kujeran Servet Koç di sala 2016an de bi rêya medyaya dîjîtal xwe gihandibû kûrê Kadrî Bagdû, Îsmaîl Bagdû û qala bûyerê jê kiribû.
Servet Koç qala kuştina Kadrî Bagdû kiribû û diyar kiribû dewlet wan bi kar aniye. Lê tevî van agahiyan jî di dozê de tu pêşketin çênebû. Di 13ê Tîrmehê de MÎTa Tirkiyeyê daxuyaniyek dabû û diyar kiribû ku Talîp Guler ê bi nasnav “Abdusselam Turkî” ku dihat îdiakirin di nava rêxistinbûna DAIŞê ya Tirkiyeyê de ku wekî “Ofîsa Farûq” tê nasîn û bi bultena sor lêgerîna wî hebû ji Sûriyeyê anîne Tirkiyeyê. Lê medya Tirk û MÎTê qet qala ku ev kes yek ji kujerên Kadrî Bagdû ye nekiribûn.
Hevjîna Kadrî Bagdû, Şemsê Bagdû derbarê anîna yek ji kujeran de ji ajansa me re axivî
‘Piştî kujerek anîn Tirkiyeyê divê doz bi pêş ve biçe’
Şemsê Bagdû diyar kir ku ew dixwazin ser dozê neyê girtin û dosye wek dosyeyek faîl nediyar nemîne û wiha got: “Kujer piştî bûyerê çûn Sûriyeyê. Polîsan ji me re got, Servet Koç ê ku ji me re dîmen şandibû ew li Reqayê hate kuştin. Yek ji wan dest û lingê wî jê bûye û li Stenbolê ye. 2 kesên din jî em nizanin çi bi serê wan hat. Kesê ku gule berdabû Qedrî, Tirk bû, rewşa wî jî ne diyar e. Dozê birin buroya faîlî meçhûl. Çawa ku Servet Koç ji me re dîmen şand me dîmen bi emniyet, parêzer, ÎHD û dozgeriyê re parve kir. Lê rojekî emniyet û dozgerî ji me re negot, ‘ev çi dîmen e, kî şandiye?’ Heta ku Servet Koç li Reqayê hate kuştin, paşê polîs li kûrê min geriya û dibêje, ‘Yek ji kujeran li Reqayê hatiye kuştin’. Bi salan behsa bûyerê nekirin lê piştî qatîl hate kuştin, demildest me geriyan. Heta dawiyê em ê li pey dozê bin. Em ê serlêdanek nû bikin. Lê ew dixwazin doz wekî faîl nediyar bimîne. Em dixwazin doz ji niha şûn ve bi pêş ve biçe, yek ji kujeran anîn Tirkiyeyê lê tu tişt ji me re negotin. Me dozê heta Dadgeha Mafên Mirovan a Ewropayê (DMME) jî bir. Doz wê berdewam bike, em dev ji dozê bernadin.”
