Platforma Mamosteyên Mexdûrê Mulakatê û Mamosteyên Sektorên Taybet ji bo daxwazên wan di Komîsyona Perwerdehiyê ya Neteweyî de bên niqaşkirin daxuyanî dan û banga pêkanîna daxwazên xwe kirin.
Platforma Mamosteyên Mexdûrê Mulakatê û Mamosteyên Sektorên Taybet, ji bo mafê xwe yê mûçeyê bingehîn û daxwaza peywîrdariyê li Enqereyê dest bi çalakiyan kiribûn. Mamosteyên ku ji ber qedexeyên ji bo Lûtkeya NATOyê navber dabûn çalakiyê piştî rabûna qedexeyan çalakiya xwe domandin. Mamosteyên li ber avahiya Sendîkaya Mamosteyên Sektora Taybet a ku navçeya Çankaya ya Enqereyê civiyan û li wir heta Peykera Madenê yê kolana Olgunlarê ya navçeya Çankaya ya Enqereyeyê meşiyan. Girsê di meşê de bê navber dirûşmeyên ‘Wezîrê patronan Yusuf Tekîn îstifa’ û ‘Mamoste dersa têkoşînê didin’ berz kirin. Piştrê jî li ber peykerê madenê daxuyanî dan. Parlamenterên DEM Partiyê Perîhan Koca û Kezîban Konukçu jî tevlî daxuyaniyê bûn.
Parlamentera DEM Partiyê Perîhan Koca ku di daxuyaniyê de axivî, anî ziman ku ew dê dengê mamosteyan bigihînin meclîsê û got ku ji bo daxwazên mamosteyan divê gavên şenber bên avetin.
Parlmentera DEM Partiyê Kezîban Konukçu jî bi lêv kir ku ji bo daxwazên mamosteyan pêk werin daxwaza avakirina komîsyonê kirine û diyar kir ku ew dê di komîsyonê de temsîliyeta mamosteyan bikin
‘Daxwazên me bi cih bînin’
Piştî axaftinan metna daxuyaniyê ji aliyê endamê Sendîkaya Mamosteyên Taybet Umut Erkurt ve hat xwendin.
Umut Erkurt diyar kir ku mamostetî û perwerdehî ji sektora taybet re hatiyê pêşkêşkirin û wiha axivî: “Demeke dirêj e mamostetî bûye qada bêewlehiyê, mûçeyên kêm û kiryarên bi kêyfî. Me bi çalakiyan ne tenê daxwazên xwe anîn ziman di heman demê de kiryarên li ser perwedehiyê ku neyinî bandor dike jî derxist holê. Komîsyona meclîsê dikare van pirsgirêkan çareser bike û ji daxwazên me re bibe bersiv lê bi zanebûn vê yekê nakin. Îro komîsyona Perwerdehiya Netewî dicive. Em dizanin ku ew komîsyon daxwazên mamosteyan nîqaş nake. Ev kiryar helwesteke polîtîk e. Helwesta perwerdehiyê li gor piyasayê diyar bikin e. Ev helwest pirsgrêkan kûrtir dike. Em wan kiryaran qebûl nakin. Ev xilaskirina civakê yê. Em dixwazin çareserî bi lez were rojevê. Daxwazên me mafên me ne. Em li vir bang dikin ku daxwazên me bi cih bînin. Bila mafên me yên mûçeyan bi zagonan ewle bikin. Yên ku mafê wan ê peywirdarkirinê hatiyê binpêkirin werin peywirdarkirin.”
Daxuyanî bi berzkirina dirûşmeyan bi dawî bû.
