Amerîkayê ragihand ku ji bo parastina keştiyên bazirganiyê yên li Tengava Hurmuzê wan êrişên nû li dijî Îranê kirin e. Îranê jî ragihand ku êriş biriye ser hedefên leşkerî yên li Urdun, Bahreyn, Kûweyt û Ûmmanê yên Amerîkayê.
Fermandariya Hêzên Navendî ya Dewletên Yekbûyî yên Amerîkayê (CENTCOM) ragihand ku bi dema Washingtonê saet di 17:00 de li dijî Îranê dest bi pêleke nû ya êrişan kir. CENTCOMê ragihand ku operasyon ji bo parastina trafîka deryayî ya bazirganiyê û keştiyên sivîl ên li Tengava Hurmuzê bû. Di daxuyaniyê de hate gotin, bi fermana Serokê DYAyê Donald Trump ji bo “hesabpirsîna” ji hêzên Îranê operasyon hatiye kirin.
Li gorî medya dewletê ya Îranê di êrişên DYAyê de li eyaleta Hurmuzganê xebatkarekî telekomunîkasyonê jiyana xwe ji dest da, 2 kes jî birîndar bûn. Li gorî ajansa IRNAyê jî li bajarê Mahşehrê di êrişeke din de kesekî jiyana xwe ji dest da, çar kes jî birîndar bûn.
Îranê bersiva êrişan da
Mihefizên Şoreşê yên Îranê jî ragihandin ku weke bersivê li dijî baregehên Emerîkî yên li Bahreyn, Urdun û Kûweytê xistin e. Mihefizên Şoreşê her wiha diyar kirin ku li sîstemên radarê yên li Ûmmanê xistin e.
Artêşa Urdunê eşkere kir ku çar fuzeyên ji aliyê Îranê ve hatin avêtin ji aliyê sîstema parastina hewayî ve hatin astengkirin û tiştek bi kesî nehat.
Serokatiya Fermandariya Giştî ya Kûweytê jî ragihand ku wan sîstema parastina hewayî xistine dewrê.
Wezareta Karên Derve ya Îranê ragihand ku êrişên dawî yên DYAyê hewldanên dîplomatîk ên mehên dawî bi temamî pûç kirine.
Wezaretê diyar kir ku Washingtonê lihevkirina beriya niha binpê kiriye û li Tengava Hurmuzê careke din atmosfereke nearam afirandiye.
Petrol giran bû
Metirsiya belavbûna şer li Rojhilata Navîn û rageşiya li Tengava Hurmuzê bandor li bazara enerjiyê jî dike. Buhayê warîleke petrolê ya Brent ji sedî 3,75 zêde bû û bû 78,86 dolar. Petrola xav a DYAyê (WTI) jî ji sedî 3,65 zêde bû û bû 74,02 dolar.
