KCKê dayika aştiyê Bahar Bîlge bi bîr anî û wiha got: “Em dayika xwe Bahar bi rêzdarî, minet û hezkirin bi bîr tînin. Weke zarokên dayikek wiha em soza xwe dubare dikin ku bi berxwedan û biryardarî xeyalên wê pêk bînin.”
Dayika Aştiyê Bahar Bîlge ya xwe wek ‘Ez dayika Serok û Kurdistanê me’ pênase dikir û hevjîn, du kurê wê û du neviyê wê di têkoşîna azadiya Kurdistanê de jiyana xwe ji dest dane, di 10ê Tîrmehê de wefat kir.
Li ser wefata dayika Bahar Bîlge Hevserokatiya Konseya Rêveber a KCKê daxuyanî da û diyar kir ku tevî tememê xwe yê mezin jî têkoşîna xwe domandiye û ji bo doza rewya ya gelê xwe bimeşîne kêliyekê jî teredut nekiriye.
KCKê di destpêka daxuyaniyê de dayikê bi rêzdarî, minet û hezkirin bi bîr anî û wiha got: “Dayika Bahar dizanî ku em xwedî rastiya gelekî welê ne ku hebûna wê tune hatiye hesibandin û ji bo bibe xwe ji derveyî têkoşînê tu rêyên din jê re nebû. Dayika Bahar her kêliya jiyana xwe li gorî vê şêwe daye, di vê oxirê de ji dayîna tu berdêlan xwe nedaye paş. Di sala 94an de bû şahida şehadeta hevalê jiyana xwe, ev yek nebû sedem ku ew paşde gav biavêje û weke kesek bi rûmet û dilsozê xak, çand û zimanê xwe erdema jiyankirinê derbasî du kurên xwe jî kir û li pey wê jî du neviyên xwe kir neferê vê doza bi maf û şehadeta wan dît. Ji ber ku dil dabû doza azadiyê zext, îşkence û zilm ji jiyana wê tu carî kêm nebûye, lê li dijî van hemûyan weke dayikek Kurdistanê ya serbilind hemû berpirsyariya xwe bi cih anî, bersiv da û tevî hemû zehmetiyan û temenê xwe yê mezin tim di nava têkoşînê de bû. Ji serhildanan dest pê kir û di her qonaxa têkoşîna azadiyê de, bi roleke aktîf rabûye. Herî dawî di înîsiyatîfa Dayikên Aştiyê de ku demek dirêj bi hewldaneke mezin di nav de cih digirt, bêyî hincet heta nefesa xwe ya dawî li herî pêş têkoşîna xwe dewam kiriye. Di vî warî de dayika Bahar dayika hemû zarokên Kurdistanê û milîtanên azadiyê bû. Xwe bi têkoşîna azadiyê re kir yek û bûye temsîla têkoşînê.
Dayika Bahar bûye dengê serhildanê
Dayika Bahar bûye dengê serhildanê yê hemû jinên ku êş kişandine û dengê wan di kûrahiya dîrokê de hatiye hepskirin. Bûye îspata wê yekê ku jin tenê bi têkoşînê dikarin xwe ava bikin. Hemû jiyana dayika Bahar di nava têkoşînê de derbas bû, bêyî teredut tevlî pêvajoya aştî û civaka demokratîk a ji aliyê Rêbertiya me ve hatî destpêkirin, bû. Bi dilsoziya xwe ya bi Rêbertî û şehîdan re ji bo mayîndebûna aştiya demokratîk, hebûna me û destkeftiyên me têkoşîneke aktîf raber kiriye. Dayika Bahar guh neda nexweşiyên xwe û bedena xwe ya westiyayî, heta bêhna xwe ya dawî têkoşîna xwe domand û jiyana xwe ji dest da. Ji ber vê yekê, ew bû şehîda pêvajoya aştî û civaka demokratîk.
Em serbilind in ku zarokên dayikek wiha ne. Di serî de malbata me ya welatparêz a hêja, em ji hevrêyên dayika Bahar Dayikên Aştiyê, gelê xwe û hemû jinan re sersaxiyê dixwazin. Em dayika xwe Bahar bi rêzdarî, minet û hezkirin bi bîr tînin. Weke zarokên dayikek wiha em soza xwe dubare dikin ku bi berxwedan û biryardarî xeyalên wê pêk bînin.”
