Hevserokê Konseya Rêveber a KCKê Cemîl Bayik bal kişand ser rola bingehîn a civakê û diyar kir ku çareserî ne tenê di destê dewletê de ye. Bayik anî ziman ku divê gel li benda gavên dewletê nemîne; berevajî vê yekê, bi hêza xwe ya rêxistinbûna komînal û têkoşîna demokratîk a civakî xwedî li îradeya xwe derkeve.
Beşa duyemîn a roportaja Ajansa Nûçeyan a Firatê (ANF) bi Hevserokê Konseya Rêveber a KCKê Cemîl Bayik re kirî, hate weşandin. Bayik di raporotajê de balkişand ser nêzîkatiya dewletê ya li hemberî pêvajoyî û diyar kir ku Pêvajoya Aştî û Civaka Demokratîk di qonaxa heyî de bi astengî û xeteriyên giran re rûbirû ye. Bayik got ku gavên heta niha ji bo çareseriyê hatine avêtin bi tenê têrê nakin û diyar kir ku ji bo pêvajo bi awayekî saxlem bi pêş ve biçe, divê teqez gavên siyasî û hiqûqî yên berbiçav bên avêtin.
‘Zagona rêveberiyan li derve dihêle, pêvajoyê tevlîhev dike’
Bayik rexne li zagonên heyî yên ku ji bo pêvajoyê hatine çêkirin kir û got ku ev zagon pirsgirêkan çareser nakin, berovajî wê kûrtir dikin. Bayik anî ziman ku ev nêzîkatiya endamên rêxistinê kategorîze dike û hejmareke girîng a kadroyan li derveyî çarçoveya zagonî dihêle pêvajoyê dixe xetereyê. Bayik ev rewş weke “bi vir li lingê xwe xistin” pênase kir û destnîşan kir ku heta bi nêrînekî demokratîk û adil nêzîkî mijarê nebin, pirsgirêkên xitimînê dê her berdewam bikin.
‘Demokratîkbûn û çareseriya pirsgirêka Kurd weke goşt û neynûkê ne’
Di dewama axaftina xwe de, Bayik bal kişand ser girîngiya demokratîkbûna giştî û diyar kir ku çareseriya pirsgirêka Kurd û demokratîkbûna Tirkiyeyê ji hev nayên qetandin. Bayik derbirî ku heta înkara li ser nasname û mafên bingehîn ên gelê Kurd berdewam bike, avakirina jiyaneke aram û demokratîk li Tirkiyeyê ne pêkan e. Bayik bang li hemû hêzên demokratîk, rewşenbîr û aliyên sosyalîst kir ku ji bo çareseriyê zêdetir berpirsiyarî bigirin ser xwe û xwedî li vê pêvajoya dîrokî derkevin.
‘Divê Rêber Apo bi raya giştî re bicive’
Têkildarî spekulasyon, nûçeyên derew û provokasyonên ku li ser girtîgeha Îmraliyê tên kirin, Bayik got ku ev lîstik ji aliyê derdorên ku naxwazin pirsgirêka Kurd çareser bibe ve tên organîzekirin. Bayik destnîşan kir ku ji bo pêşîgirtina li van provokasyonan û ronîkirina rastiyan, divê derfet bê dayîn ku Rêber Apo bi awayekî azad bi nûnerên saziyên sivîl, rojnamevan û raya giştî re rasterast hevdîtinan pêk bîne.
‘Divê gel li benda dewletê nemîne, bi rêxistinbûna komînal çareseriyê bîne’
Di dawiya nirxandinên xwe de, Cemîl Bayik bal kişand ser rola bingehîn a civakê û diyar kir ku çareserî ne tenê di destê dewletê de ye. Bayik anî ziman ku divê gel li benda gavên dewletê nemîne; berevajî vê yekê, bi hêza xwe ya rêxistinbûna komînal û têkoşîna demokratîk a civakî xwedî li îradeya xwe derkeve. Bayik da xuyakirin ku bi yekitî û xwerêxistinbûna gel, dê hemû astengî werin şikandin û pêvajo bigihîje encamekî serketî.
