Rêxistina DEM Partiyê ya Wanê, bi dirûşma ‘Em ji bo Aştî û Civaka Demokratîk Xwe bi Rêxistin Dikin’ li navçeya Rêya Armûşê civîna gel pêk anî. Di civînê de banga mezinkirina rêxistinbûnê hat kirin.
Rêxistina Partiya Wekhevî û Demokrasiyê ya Gelan (DEM Partî) a Wanê, bi dirûşma ‘Em ji bo Aştî û Civaka Demokratîk Xwe bi Rêxistin Dikin’ li eywaneke dawetê ya li navçeya Rêya Armûşê civîna gel li dar xist. Di eywanê de pankarta mezin a bi ‘Em ji bo aştî û civaka demokratîk xwe bi rêxistin dikin’ hat vekirin. Nûnerên saziyên sivîl û gelek welatî tev li civînê bûn.
Civîna gel bi deqeyeke rêzgirtinê ji bo bîranîna kesên di têkoşîna demokrasî û azadiyê de jiyana xwe ji dest dane dest pê kir.
Piştî deqeyeke rêzgirtinê Hevserokê DEM Partî yê Rêxistina Bajêr Veysî Dîlekçî axivî.
Veysî Dîlekçî bal kişand ser ketina qonaxa nû ya pêvajoya ‘Aştî û Civaka Demokratîk’ û diyar kir ku aştî û avakirina civaka demokratîk bi rêxistinkirinê pêkan e û wiha got: “Divê em ne tenê derdora xwe, hewce ye em her derî rêxistin bikin. Em ketine pêvajoyeke nû, daxwaza me ya ji bo aştî û civaka demokratîk, xwe di nav vê pêvajoya rêxistinkirinê de pênase dike.”
‘Hebûna me bi rêxistinkirinê pêkan e’
Dû re Hevşaredarên Bajarê Mezin ên Wanê Neslîhan Şedal û Abdullah Zeydan axivîn.
Neslîhan Şedal bi bîr xist ku di manîfestoyê de xala herî pêşîn rêxistinkirin e û ev tişt anî ziman: “Di manîfestoyê de jî di destpêkê de dibêje ‘Tu çi qas rêxistinkirî bî, tu ew qas heyî.’ Ji bo ku em hebûna xwe biparêzin, divê em di nav hemû saziyan û di nav civakê de xwe rêxistin bikin. Di heman demê de, di vê pêvajoyê de divê em bi tarzeke nû xwe bi saz bikin. Ev tarzê nû jî di nav civakê de, bi mezinkirina têkiliyan û bi rêxistinkirinê re wekî hebûna me tê pênasekirin. Ji ber wê yekê, hemû saziyên me û partiya me di vê pêvajoyê de xwe li gorî vê serdemê ji nû ve ava dikin û rêxistin dikin.”
‘Ji bo civaka demokratîk xwerêxistinkirin şert e’
Abdullah Zeydan jî di axaftina xwe de bal kişand ser girîngiya avakirina hişmendiya civaka demokratîk a di qonaxa nû de û bang li beşdaran kir ku her mal û kolanê bikin qada birêxistinkirinê.
Abdullah Zeydan anî ziman ku ji bo avakirina civakeke demokratîk, di vê pêvajoya nû de xwerêxistinkirin û yekîtiya civakî şertê herî bingehîn e.
‘Pêşengê gelê Kurd nayê xapandin’
Herî dawî Parlamenterê DEM Partiyê yê Wanê Mahmût Dîndar axivî û bal kişand ser polîtîkayên ku li ser gelê Kurd û pêşengên wan tên meşandin.
Mahmût Dîndar destnîşan kir ku tu lîstik nagihîjin armanca xwe û wiha got: “Serokê gelê Kurd naxapîne û nayê xapandin. Ji ber vê yekê, li hemberî her cure polîtîkayan, herî zêde di vê demê de pêdiviya me bi xwerêxistinkirinê heye. Divê em li her qadê hêza xwe bikin yek û xwe rêxistin bikin.”
Civîn bi pirs û bersivan bi dawî bû.
